STENBOL – Halîme Yeşîlmen ku ji ber êrîşên dewletê ji Kerboranê koçî Stenbolê kir, bi vekirina dikaneke ku lê kincên neteweyî didirû û difiroşe, debara malbata xwe dike.

Halîme Yeşîlmen (34) ji Kerborana Mêrdînê ye û dayika 4 zarokan e. Yeşîlmen di 1995’an de li gel malbata xwe ewil koçî Antalyayê dike. Piştî 6 salên li Antalyayê, vê carê jî ji ber sedemên abori koçî Stenbolê dikin. Yeşîlmen 16 sal e li Stenbolê dijî û destpêkê di atolyeyên tekstîlê de xebitî û xwe fêrî dirûtina kincan kir.


LI STENBOLÊ KINCÊN HERÊMÎ DIDIRÛ

Yeşîlmen pişt re biryar da ku dikaneke ku lê kincên neteweyî yên bajarên Kurdistanê didirû vekir û 2 sal e li Taxa Haciahmet a Beyogluya Stenbolê dikana kincên neteweyî bi rê ve dibe. Yeşîlmen debara malbata xwe bi firotina kincên neteweyî dike. Yeşîlmen ku li navçeya Zeytînburnu dijî her roj tê Haciahmetê û dikana xwe vedike. Li dikana Yeşîlmen di heman demê de gelek kinc û bergên cuda jî hene û difiroşe.

JI HER DERDORÊ JIN DIÇIN DIKANÊ

Yeşîlmen dest nîşan kir ku ew bi tenê li dikanê dixebite û wiha got: “Cihê min cihê kincên jinan e. Ez fîstanên jinên kurd çêdikim. Şelwaran jî çêdikim. Ji bilî vê jinên taxê çi tînin ez çêdikim. Çi tê vir çêdikim. Bi paş ve nazîvirînim. Jinên kurd, ereb, tirk û ji her derderê jin tên dikanê û kincan ji wan re çêdikim. Ji ber ku kincên neteweyî li her derê nayên çêkirin jin dikana min tercîh dikin.”

'KAR BAŞ E’

Yeşîlmen dest nîşan kir ku ji ber ku bêtir kar li semta Haciahmetê dibe hatiye vir dikan vekiriye û ev tişt gotin: “2-3 mehê destpêkê kar nedibû. Lê niha kar di rê de ye. Mirovên tên dikana min jî gelek baş in û samîmî ne. Niha ez jî bûme wek keseke ji Haciahmetê. Carina rojê 200 lîre qezenc dikim. Carina jî qet qezenc nakim. Ji bo kincên neteweyî û herêmî eleqeyeke zêde ya jinan heye."