WAN – Qeyûmê Şaredariya Bajarê Mezin a Wanê Navenda Jiyanê ya Jinan a Rojîn ku 3 salin di bin banê şaredariyê de xizmet dida jinan girt û li şûna wê "Navenda Jiyanê" ku zarok lê qursa Qur'anê dibînin vekir.

Li Wanê piştî qeyûm tayînê Şaredariya Bajarê Mezin a Wanê kirin, hemû saziyên jinan ên di bin banê şaredariyê de xizmet didan yek bi yek hatin girtin. Navenda Jiyanê ya Jinan a Rojîn ku nêzî 50 jin lê dixebitîn û xizmetê didan jinan ji kar hatin avêtin. Qeyûm tu şop ji Navenda Jiyanê ya Jinan a Rojînê nehişt û li şûna wê "Navenda Jiyanê" ku zarok lê qursa Qur'anê dibînin vekir. Her wiha qeyûm Navenda Midûriyeta Polîtîkaya Jinan bi Serokatiya Daîreiya Civak û Çandê ve girêda. Stargehên jinê girt û bi sedema qursiyer tune û xizmetê nade girt û li şûna wan qursên Qur'anê vekir.

Piştî qeyûm hat ser Şaredariya Wanê, karmendên 15 salin di şaredariyê de dixebitin tayînî midûriyeta Şaxa Pêşxistina Aboriya Jinê û Midûra Şaxa Perwerde û Lêkolînê kir. Daîreyê, bi hinceta "qad dijwar e" Midûriyeta Şaxa Têkoşîna li dijî Tundiyê ya li Hemberî Jinan girt. Daîreyê Stargeha Jinan jî bi sedema "Avahî ne guncav e girt. Navenda Jinan a Rojîn ku 50 xebatkarê wê hebûn, piştî hat girtin, bê hincet ji kar hatin avêtin. Serokatiya Daîreya Xizmetên Malbatê û Jinê jî piştî çend roj şûnde dewrî Navenda Perwerdehiya Gel kir. Ji bo Kargeriyan jî mamosteyên girêdayî Navenda Perwerdehiya Gel tayîn kir.

Navenda ku di serdema DBP'ê de xizmet da bi hezaran jinên koçber û piştgirî da aboriya malbatan, piştî qeyûm tev girtin û li şûna wan Navenda Jiyanê ava kir û niha zarok li vir Qursa Qur'anê dibînin. Li navenda ku divê qursa xalîçe, piyano, keman û yên din bê dayîn, tenê zarokên ku tên qursê li vir kom dibin. Li van navendan jî wêneyên leşker, tang û topên hewldana derbeyê ya 15'ê Tîrmehê hatin daliqandin.

Jinên ku bi tundiyê re rû bi rû dimînin û bi telefonê li Serokatiya Daîreya Civakî û Çandê ya Şaredariyê digerin jî mêr bersivê dide wan û neçar dimînin bi mêr re bibin muxatab. Mêr bersiva "Saziya me ya Navenda Jiyanê ya Jinê ya Rojînê tune, em nikarin tiştekî bikin biçin serî li walîtiyê bidin."

Kargeriya Tekstîlê ku her serdemekê perwerde dida 40 jinan, di 4 serdeman de 160 jin perwerde kirin. Di kargeriya Xaliçeyan de jî her serdemekê perwerde da 25 jinan û di 5 serdeman de 125 jin perwerde kirin. Kargeriyên girêdayî Mudûriyeta Pêşxistina Aboriyê jî bi hevkariya KOSGEB'ê perwerdehiya merş û mahfûran fêr bûn.

HEM MÊR Û HEM JIN PERWERDE KIRIN

Midûriyeta Şaxa Lekolîn û Perwerdehiyê jî hem li navenda Wanê û hem jî li navçeyên Wanê li ser "Rola zayendiya civakî", "Wekheviya jin û mêr" û "Mafê mirovan û tenduristiya welidandina jinê" perwerde da jin û mêran. Dîsa gelek perwerdehiyên xweser dan. Di her serdemekê de 50 kes hatin perwerdekirin û bi giştî di 3 salan de bi hezaran jin û mêr hatin perwerdekirin. Di 8'ê Adarê û 25'ê Mijdarê de dîsa têkildarî girîngî û wateya rojê gelek panel li dar xistin.

DI 3 SALAN DE ZÊDEYÎ 500 KES SERÎ LÊ DA

Di nava 3 salan de nêzî 500 kes serî li Mala Stargehê û Navenda Piştevaniya Jinê da û alîkarî xwestin.