EDENE - Dadgehê cezayê "hepsa malê" da C.S.'yê ku A.Y.'ya 15 salî îstismar kir. Parêzer Sevil Araci Bek îtirazî vê rewşê kir û got ku, ji bo C.S. bê girtin wan serî li dadgehê daye.

Li Edeneyê rêveberê apartmanê C.S., 4 salan A.Y.'ya 15 salî ku keça malbateke ku di heman apartmanê de dixebite, îstismar kiribû û dadgehê cezayê "hepsa malê" li C.S. birîbû. Parêzer Sevil Araci Bek vê rewşê nirxand. Bek anî ziman ji bo C.S. bê girtin wan serî li 3'yemîn Dadgeha Cezayê Giran a Edeneyê daye û dê dadgeh di nava vê hefteyê de biryarê bide.

Bek, anî ziman der barê C.S. de li 3'yemîn Dadgeha Cezayê Giran a Rihayê bi tawanbariyên "îstismarkirina zayendî ya zarok û gefxwarinê" doz hatibû vekirin û dê danişîna yekemîn a dozê di 19'ê Cotmehê de bê dîtin. Bek, dest nîşan kir ku tevî ku dadgehê "nêzîkbûna navnîşan zarokê", "tehdîdên li mexdûre û malbata wê, gotinên şidet, heqaret û biçûkxistinî" li C.S. qedexe kiribûn jî, kurê C.S. gef li malbata mexdûreyê xwarine û malbatê gilî kiriye. Bek, anî ziman ku biryara parastina mexdûre û malbata wê hatiye kirin û wiha got: "Li gel vê biryarê jî îstismarkarê zayendî û malbata wî, heqaretan li mexdûre û malbata wê dikin." Bek, da zanîn ku ji bo mexdûre û malbata wê dev ji giliyê berdin C.S. bi ser wan de çûye. Bek, got ku malbata mexdûr serî li dadgehê dane û diyar kirine ku gef li wan tên xwarin û heqaret li wan tê kirin. Bek dest nîşan kir ku ew li bendê ne ku dadgeh biryara girtina C.S. bide.

DIVÊ JIN PIŞTEVANIYA HEV BIKIN'

Bek, diyar kir ku ji ber îstismarê A.Y. travmayê derbas dike. Bek, anî ziman ku li Edeneyê bûyerên îstismarê zêde çêdibin û wiha got: "Heta ku ji destê me tê em mudaxileyî van bûyeran dikin. Em mudaxilî dozan dibin û dişopînin." Bek, bang li hemû jinan kir ku li dijî bûyerên bi vî rengî bi piştevaniyê tevbigerin.