AMED - Gulcihan Şimşek, der barê çalakiyên TJA'yê de axivî. Şimşek got ku dê jin di meha Îlonê de dakevin kuçeyan û dê di şert û mercên OHAL'ê de têkoşîna rêxistinbûyî bilind bikin.
Tevgera Jinên Azad (TJA), piştî kampanyaya "Em ê qirkirina jinan rawestînin, jiyanê azad bikin" ku di 3'yê Tebaxê de li Êlihê dabûn destpêkirin, di 19'ê Tebaxê de li Stenbolê ji bo azadiya Rêberê PKK'ê Abdullah Ocalan starta kampanyaya "Dê tecrîd wind abike, azadî bi serkeve" da. Aktivîsta TJA'yê Gulcihan Şîmşek der barê herdu kampanyayan de axivî.
Şimşek, anî ziman ku şerê ku li Rojhilata Navîn didome li Şengalê veguheriye qirkirinekê û 5 hezar jinên ku DAIŞ'ê ew revandine û qetil kirine û tecawizî wan kirine bi bîr xist. Şîmşek, got ku di 3'yê Tebaxê de qirkirina jinan çêbûye û ji ber vê yekê wan di meha Tebaxê de starta kampanyayê daye. Her wiha Şîmşek anî ziman ku ji ber li hemberî jinan bi awayekî zêde êrîş û qirkirin pêk tên wan li Êlihê starta kampanyayê daye. Şimşek anî ziman ku li hemû qadên jiyanê jin bi êrîşan re rû bi rû ne. Şîmşek dest nîşan kir ku kampanyaya 3'yê Tebaxê her cure êrîş, qirkirin û polîtîkayên qirkirinê yên li hemberî jinan di xwe de dihebîne. Şimşek, dest nîşan kir ku ew ê bi vê kampanyayê berxwedan û têkoşîna jinan bi pêş ve bixin. Şimşek, anî ziman ku AKP di 15 salên îktîdara xwe de herî zêde jinê hedef girtiye û ew ê li hemberî vê yekê têkoşînê xurt bikin.
‘DÊ JIN DAKEVIN KUÇEYAN'
Şimşek, anî ziman ku ji ber OHAL'ê her tişt hatiye qedexekirin, lê belê jin OHAL'ê nas nakin û ew ê li hemberî vê li hemû qadên jiyanê bitêkoşin. Şimşek, diyar kir ku dê kampanyaya wan bi awayekî hevpar li Tirkiye û bajarên herêmê bê birêvebirin û ew ê li dijî tecrîda li ser Rêberê PKK'ê Abdullah Ocalan, êrîşên li hemberî vîna jinê, li hemberî OHAL û KHK'yan li qadan bin. Şimşek, da zanîn ku dê di rojên pêş de çalakiyên wan dest pê bikin û ew ê çalakiyên nobetê, civîn, panel, semîner û mîtîngên mezin li dar bixin.
Şimşek, anî ziman ku tecrîda li ser Ocalan di heman demê de tecrîda li ser jinê ye û hedefa kampanyaya wan ji bo rakirina tecrîda li ser Ocalan û ji bo azadiya wî ye. Şimşek, diyar kir ku dê kampanya xwe bigihîne hemû jinan û dê ji bo hemû jinan bê vegotin. Şimşek diyar kir ku ew ê tevî jinan li kuçeyan kampanyayê bi rê ve bibin û wiha axivî: "Em ê li kuçeyên ku azadiya me tê binpêkirin careke din biqîrin ku em OHAL'ê nas nakin. Em bang li hemû jinan dikin da li dor kampanyayê bibin xelek û têkoşînê bilind bikin."