NAVENDA NÛÇEYAN - Li dijî civîna G20 ya li Hambûrgê hefteyek e çalakiyên protestoyê didomin. Îro jî bi deh hezaran kesan meş li dar xistin û sloganên“Ji Abdullah Ocalan re azadî” û “Ji Kurdistanê re aştî” berz kirin.

Bi deh hezaran li dijî Civîna G20 ya li Hambûrga Elmanyayê dimeşin. Hefteyek e çalakiyên protestoyê berdewam dikin. Çalakiyên şermezarkirinê yên bi “Civîna Alternatîf” dest pê kirin bi xwepêşandanên li kolanan didomin. Polîsan duh destûra meşê nedan xwepêşanderên ku ji bajarên cihê yên Ewrûpayê hatibûn û polîs bûn sedem ku gelek kes birîndar bibin. Ciwanan li navendên bajêr li Altona St. Paûlî barîkat ava kirin. Bi taybetî li Sternschanzeyê ciwanan barîkat ava kirin û nehiştin polîs êrîş bikin. Di pevçûnên heta destê sibehê domiya gelek kes birîndar bûn û hatin binçavkirin. Li gorî daxuyaniya polîsên Hambûrgê nêzi 200 polîs birîndar bûne û bêtirî 200 xwepêşandan hatine binçavkirin. Hat zanîn ku bi deh hezaran polîs di çarçoveya G20’ê de hatine wezîfedarkirin.

‘JI OCALAN RE AZADÎ, JI KURDISTANÊ RE AŞTÎ’

Xwepêşandana herî mezin jî bi beşdariya 70 sazî û dezgehên Elmanyayê bi meşekî hat lidarxistin. Li ser navê kurdan NAV-DEM jî beşdar bû. Meş li pêşiya îstasyona trênê ya Hambûrgê dest pê kir û nêzî 4 kîlometreyan wê li St. Paûlî bi dawî bibe. Li vê derê wê nûnerên saziyan daxuyaniyan bidin.

Çalakvanên kurd jî bi pankart û sloganên “Ji Abdullah Ocalan re azadî” û “Ji Kurdistanê re aştî” di nav refên meşê de cih girtin. Her wiha pankart û dovîzên li ser Şoreşa Rojava û têkoşîna azadiya kurd û posterên Ocalan hatin hildan. Di meşê de sloganên “Bijî Serok Apo” û “Bijî Şoreşa Rojava” jî berz kirin.