NAVENDA NÛÇEYN - Li gel danekirinên ku Wezîrê Karên Derve yê Almanyayê Sîgmar Gabrîel li dijî dewleta tirk aşkera kir, tê gotin ku rêveberiya Berlînê dê hevkariya xwe ya leşkerî ya bi dewleta tirk re radiwestîne.

Li gorî nûçeya Rojnameya Bîldê, ku yek ji rojnameyên girîng ên Almanyayê ye, rêveberiya Merkel hemû projeyên xwe yên biçekkirinê yên bi Tirkiyeyê re radiwestîne. Rojnameyê agahiyên nûçeya xwe spart çavkaniyên hikumetê yên li Berlînê.

Bi vî rengî wê cara yekê be ku welatekî endamê Rêxistina Peymana Bakurê Atlantîkê (NATO) hevkariya xwe ya leşkerî ya bi endamekî din ê NATO'yê re dibire. Gelke febrîqeyên alman ên çekan hildiberînin, li Tirkiyeyê ne.

Tevî ku hikumeta alman di mehên bihurî de peymanên firotina çekan ji bo Tirkiyeyê asteng kiribû jî şîrketa Rheînmetall a Alman plan kiribû ku li Tirkiyeyê febrîqeyeke hevpar a tankan çêbike. Sala 2015'an di navbera Rheînmetall û Saziya Endustrî Makîna Kîmya ya Tirk de, ji bo çêkirina cebilxaneyê û modernîzasyonê, peyman hatibû mohrkirin.

Wezîrê Karên Derve yê Almanyayê Sîgmar Gabrîel duh civîneke çapemeniyê li darxistibû û piştî girtina aktîvîstê mafên mirovan ê alman Peter Steudtner li Tirkiyeyê, hin danekirin li ser rejîma Erdogan ferz kiribû.

Gabrîel ev danekirin bi van sê sernavan aşkere kir: "Birrîna alîkariyên ji Yekitiya Ewropayê tên kirin", "hişyariya ger û geştê li welatiyên alman" û "ji nû ve nirxandina garantiyên li ser krediyê tên dayin".