NAVENDA NÛÇEYAN- Kabîneya Ewlehiyê ya Îsraîlê diyar kir ku ew dê dedektorên li pêşiya Mescîd-î Aksayê rakin û li cihê wê pergaleke hêj pêşketî ya teknolojîk bi kar bînin. Hikumeta Îsraîlê ji ber nerazîbûnan dedektorên metal ên danîbû pêşiya Mescîd-î Aksa, rakir.

Bûyerên ji ber kontrolên li pêşiya Mescîd-î Aksa derketibûn, ket rojeva Neteweyên Yekbûyî (NY) JÎ. Koordînatorê Taybet ê NY'yê ji bo Pêvajoya Aştiyê ya Rojhilata Navîn Nîkolay Mladenov got ku eger rageşî heta roja Înê neqede, dê krîz girantir bibe.

Tê payin ku rakirina dedektorên metal rageşiyê kêm bike.

ÇI QEWIMÎ BÛ?

Hikumeta Îsraîlê êrîşa çekdarî ya 14'ê Tîrmehê ya li pêşiya Mescîd-î Aksa ku di encamê de 2 polîs mirin, ji xwe re kir hincet û ev der ji îbadetxaneyê girt. Piştre dedektorên metal li pêşiya deriyan bi cih kir.

Serokdewletê Fîlîstînê Mahmûd Abbas jî eşkere kiribû ku ew hemû têkiliyên xwe yên bi Îsraîlê re dibirin.