RIHA- Şaredariya Bajarê Mezin a Rihayê bi hinceta ku "Tozê çêdike û derdorê gemarî dike" cihê bazara kayê guhernd û li derveyî bajêr yeke nû vekir. Lê belê, bêyî ku ya kevn bigire esnaf çûn ya nû û niha ji ber ku ya kevn vekiriye esnafên çûne ya nû mexdûr in.

Bi hinceta "Tozê çêdike û derdorê gemarî dike" cihê bazara kayê ya li navçeya Eyyûbiye ya Rihayê hat guherandin û li derveyî bajêr a nû hat çêkirin. Esnafên li Bazara Kayê ya Nû bi cih bûn, diyar dikin ku ji ber ku fealiyeta ya kevn nehatiye rawestandin ew mexdûr bûne. Esnafan got ku heta ku ya kevn çalak be ew ê nikaribin tu karî bikin.

DU BAZAR ZÊDE NE

Esnaf Huseyin Ugraş, ku li bazara kayê ya nû komîsyonvaniyê dike diyar kir ku ji bo bajarekî 2 bazarên kayê zêde ne û ji ber nêzîktir e karker jî ya kevn tercîh dikin. Ugraş, anî ziman ku dema karker diçin a kevn, li ya nû karkerên ku kayê bar bikin tune ne û ji ber nebûna karkeran ew jî tu karî nakin. Ugraş, wiha domand: "Heke me zanibûna dê wisa be, em ê jî li bazara kevn bimanan. Şaredariya Bajarê Mezin a Rihayê dema ya nû vekir ji bîr kir a kevn bigire." Ugraş, da zanîn ku barkirin û valakirina kaya spî 90 lîre û ya sor jî 80 lîre ye û wiha axivî: "Karê kayê karekî zehmet e. Toza kayê mirovan zêde dixurîne. Li nav erd em li ber tavê di bin 60 pileyî de dixebitin."

Mahmut Demîr (60) ku li bazara kayê ya nû hemaliyê dike wiha got: "Di vî karî de ji bilî rezîltiyê pêvtir tu tişt tune ye. Em tim tên eciqandin û em heqê xwe nastînin. Roj heye kar heye, roj heye qet tune ye. Bi zor û heft bela debara malbata xwe dikim. Ez li vir dixebitim zarokên min jî wek karkerên demsalî li Çûkûrova, Behra Reş dixebitin. Heke ew nexebitin ez ê bi tena serê xwe nikaribim debara malbatê bikim. Dema kar tune be ez li malê me. Ji ber temenê xwe nikarim bar bikim. Karên sivik dikim. Ji ber vê tu pereyan jî qezenc nakim. Bi hemaltiyê zarokên xwe didim xwendin."