MANÎSA -Penaberên sûriyeyî ku li Tûrgûtlûyê li ser înşeatan dixebitin, diyar kirin ku tu ewlehiya wan a karî tune ye û heqdestên wan an qet nayên dayîn an jî dema tên dayîn kêm tên dayîn. Qadîr Rahmiyê sûriyeyî, dest nîşan kir ku li Tirkiyeyê barê şer û krîzê li ser milê penaberan e.

Li Tirkiyeyê penaberên sûriyeyî di karên giran de tên xebitandin. Penaberên ku ji neçarî ji Şamê koç kirin û niha li navçeya Tûrgûtlû ya Manîsayê li ser înşeatan dixebitin, anîn ziman ku ew bi heqedesteke kêm dixebitin, lê belê li gel vê jî heqê wan nayê dayîn. Her wiha penaberên karker dest nîşan kirin ku bi tu awayî ewlehiya wan a karî û civakiyî tune ye. Penaberan got ku, li Tirkiyeyê barê şer û krîzê li ser milê wan hatiye kirin.

JI NEÇARÎ ZÊDE MESAIYÊ DIKIN

Siyamend Muhammed diyar kir ku 5 sal berê ew hatiye Tirkiyeyê û li ser înşeatan dixebite. Muhammed, anî ziman ku ew di karên giran de tên xebitandin, lê belê li gel vê jî heqê keda wan nayê dayîn. Muhammed got ku şert û mercên giran ên xebatê paşê wek nexweşînê li wan vedigere. Muhammed, anî ziman ku ji ber ew nikarin li nexweşxaneyan xwe baş bînin ziman, tedawiya wan jî baş nayê kirin. Muhammed dest nîşan kir ku pereyên ku ew werdigirin, bi zor û heft bela têra pêdiviyên wan ên rojane dikin. Muhammed, da zanîn ku dema li Sûriyeyê bûn pereyên qezenc dikirin gelekî ji yê li Tirkiyeyê zêdetir bû. Muhammed, dest nîşan kir ku ew bi keda xwe qezenc dikin û ew mecbûr in ku zêde mesaiyê bikin.

YA HEQÊ WAN NADIN AN JÎ KÊM DIDIN WAN

Adil Salam jî, diyar kir ku ji ber tim bi êrîşên nîjadî re rû bi rû diman wî û malbata xwe tim bajar diguherandin. Salam got ku dema ew li Şamê bû, wî ajokarî dikir. Salam, dest nîşan kir ku li Sûriyeyê ew bi pirsgirêka piştevaniyê re û li Tirkiyeyê jî bi ya debarê re rû bi rû mane. Salam, got ku tevî ku ew zêde dixebitin jî heqê xwe wernagirin an jî dema werdigirin kêm werdigirin. Salam, dest nîşan kir ku mafekî wan ku doza heqdesta xwe jî bikin tune ye û ji ber ku merciyeke ku serî lê bidin tune ye, dema ew îtiraz dikin an gefa şandina kampê an jî Sûriyeyê li wan tê xwarin. Salam, diyar kir ku dema şer dest pê kir, di şer de gelek xizmên wî jiyana xwe ji dest dana û heta ku ew sax be ew ê tiştên hatine serê wan ji bîr neke.

TU EWLEHIYA WAN TUNE YE

Qadir Rahmî jî, diyar kir ku ji roja ku ew li Tirkiyeyê dixebite heta niha wî xweşikî heqdesta xwe nestandiye û wiha pirsî: "Dema li vir qezayek biqewime em ê çawa xwe vebêjin, dê kî me tedawî bike?" Rahmî, anî ziman ku tu ewlehiyeke wan tune ye û ji ber ku ew mecbûr in, nikarin dengê xwe jî derxînin. Rahmî, dest nîşan kir ku ew li Tirkiyeyê barê şer û krîzê dikêşin û tekane daxwaza hemû sûriyeyiyan ew e ku dawî li şer bê û vegerin welatên xwe.