MÊRSÎN - Nûnerê Herêma Çûkûrovayê yê Sendîkaya Karkerên Tekstîlê yên Şoreşger (DEV-Tekstîl) Ahmet Sûbaşi, Herêma Pîşesaziyê ya Serbest a Mêrsînê wek "Herêma Kedxwarî ya Serbest a Mêrsînê" bi nav kir û got ku, rayedarên fîrmayê ne li karkeran li koleyan digerin.

Karkerên ku li Herêma Pîşesaziyê ya Serbest a Mêrsînê di bin şert û mercên zor de dixebitin, bi gelek pirsgirêkan re rû bi rû dimînin. Li vê herêma ku hema bêje temamiya wê ji fîrmayên tekstîlê pêk tê, karker serê sibehê şeveqê dest bi kar dikin û roja ku mesaiyê nakin herî kêm 12 saetan dixebitin. Li gel xebateke ewqas zêde jî karker heqê xwe wernagirin û mehê ancax 900 lîreyî werdigirin. Nûnerê Herêma Çûkûrovayê yê Sendîkaya Karkerên Tekstîlê yên Şoreşger (DEV-Tekstîl) Ahmet Sûbaşi, Herêma Pîşesaziyê ya Serbest a Mêrsînê wek "Herêma Kedxwarî ya Serbest a Mêrsînê" bi nav kir û û got ku rayedarên fîrmayê ne li karkeran li koleyan digerin.

ŞÎFREYÊN WAN ÊN E-DEWLET'Ê WERDIGIRIN

Sûbaşi got ku herî zêde jî di waarê tekstîlê de karker ji kar tên derxistin û ev yek herî zêde li Herêma Pîşesaziyê ya Serbest a Mêrsînê tê kirin. Sûbaşi, got ku kesên dibin endamên sendîkayê jî nayên xebitandin. Sûbaşi, diyar kir ku dema karker dest bi kar dikin xwediyên fîrmayê şîfreyên wan ên e-dewletê ji wan dixwazin û wiha got: "Bi vî awayî peywirdar dibînin ku ka karker çi dikin. Heke endamê sendîkayekê be ji xwe wî/wê nagirin kar, lê ne endam be jî ji bo nebe endam rê li ber vê yekê digirin. Ev yek jî ji bo karkeran dibe cihê tehdîdê. A rast wek ku ji karkeran re bêjin 'Hûn koleyên me ne, di bin destên me de ne, hûn nikarin tiştekî jî bikin.' Yanî ne karker li koleyan digerin."

MAFÊN WAN ÊN PÊWENDIYÊ TÊN ASTENGKIRIN

Sûbaşi, diyar kir ku beriya ku karker dest bi kar bikin telefonên wan ji wan tên stendin û wiha domand: "Li gor qanûna kar tu nikarî di dema kar de telefonê bi kar bînî, lê di mola û dema xwarinê de tu karî. Yanî di hin wextên rojê de mafê karkeran ê pêwendiyê heye, yanî ev maf nayê binpêkirin. Mesela dibe ku li malê kesek ji wan nexweş be. Yanî heke tiştek bibe berpirsiyarê vê yekê patron in. Pêwendiya karker a bi malbatê re asteng dikin."

Sûbaşi, anî ziman ku karker di bin germa havînê de dixebitin û fîrma ji bo germê tu tevdîran wernagirin. Sûbaşi diyar kir ku pirsgirêkeke din a karkeran jî destûr e û wiha axivî: Karker destûrê dixwazin lê fîrma destûrê nade. Destûrê nadin karkerên nexweş jî. Ji ber vê karker jî mecbûr e serî li rêbazeke din dide. Wê rojê naçe kar û ji bo fîrma wan ji kar dernexîne rojekê neçûye kar lê 2 an jî 3 yewmiye nayên dayîn."

HEQÊ AVÊ JÎ KARKER DIDIN

Sûbaşi, da zanîn ku heqê ava vexwarinê jî ji kîsê karkeran e û wiha domand: "Her wiha kartên têketinê hene. Ev kart 6 mehan carekê tên guherandin û pereyê wan jî ji karekran dibirin. Her wiha pirsgirêka xwarinê jî heye. Xwarineke biqalîte nadin wan. Qanûnên kar tên binpêkirin. Fîrma li gor dilê xwe tevdigerin."

Ergin Çaglar- dihaber