MELETÎ - Desteya Koordînasyina Bajêr a Meletiyê yewmiyeya karkerên demsalî 47 lîre diyar kir. Karkeran anîn ziman ku ji bo
47 lîreyî bistînin divê 14 saetan dixebitin.

Karkerên demsalî ku ji Semsûr û Rihayê ji bo berhevkirina mişmişan hatin gundê Oren ê navçeya Argan a Meletiyê, gotin ku ew heqê keda xwe nastînin û mecbûrî şert û mercên nebaş hatine kirin. Karkeran got ku ew 6 mehên salê karên demsaliyî dikin û bi pereyê ku di 6 mehan de qezenc dikin debara xwe ya 6 mehên mayî dikin. Karkeran, diyar kir ku ew di navbera Nîsan û Cotmehê de karkeriya çandiniyê dikin û ji bo 47 lîreyî rojê 14 saetan dixebitin.

Bavê 8 zarokan Hasan Gozek ku tevî malbata xwe ji Semsûrê hatiye Meletiyê û mişmişan berhev dike, dest nîşan kir ku êdî karkeriya demsalî bûye pîşeya wan û ew 6 mehên salê tim koçber in. Gozek, got ku ew ji meha Nîsanê heta ya Cotmehê dixebitin. Gozek, got ku dema ew vedigerin bajarê xwe, ji ber ku karekî wan ê domadar tune ye heta ku karê demsaliyê dest pê bike li malê rûdinên. Gozek anî ziman ku 40 roj in ew ji bo berhevkirina mişmişan hatine Meletiyê û wiha got: "Roj heye ji her malê kesek tê ji bo xebatê. Yewmiyeya wî jî 50 lîre ye û jixwe ev pere têra malbatekê nake."Gozek, got ku ji bo zarokên wan birçî nemînin ew hatine û heta ku ew vedigerin warê xwe tiştek bi wan re namîne.

ŞERT Û MERC NEBAŞ IN

Gozek, diyar kir ku zarokên wî di wextê xwe de naçin dibistanê, lewra dema dibistan vedibin hîn jî ew li kar in û ew nikarin zû dev ji kar berdin û biçin bajarê xwe. Gozek, dest nîşan kir ku ew di şert û mercên nebaş de dijîn û wiha axivî: "Ev yek bandorê li zarokan jî dike. Dev ji zarokan berda bandorê li me mezinan jî dike. Em li derdoreke vekirî dijîn. Heywanên dirinde hene. Çend roj berê dûpişk bi keçikekê veda û me bi zorê ew gihand nexweşxaneyê. Sîgorta tune ye, ewlehiya civakî tune ye. Zarokên min ên zewicaandî jî ji bo berhevkirina findiqan çûn Behra Reş. Çarenûsa wan jî wek a bavê wan e."

JI BO 47 LÎREYÎ 14 SAETAN DIXEBITIN

Memdûh Arslan ku tevî malbata xwe ji bo berhevkirina mişmişan ji Rihayê hatiye Meletiyê, got ku li ser biryara qeymeqamtiyê yewmiyeya wan 47 lîre ye. Arslan, got ku ji bo xebatê saeteke wan a diyarkirî tune ye û wiha pirsî: "Em serê sibehê saet di 7'an de dest pê dikin heta 9'ê êvarî. Ji bo 47 lîreyan em 14 saetan dixebitin. Ma Xwedê qebûl dike?" Arslan, anî ziman ku xwediyên baxçeyên mişmişan jî dibêjin "Saeta mişmişan tune ye, hûn ê bixebitin, ev kar e" û wiha domand: "Heke heqê me bidin me em ê bixebitin. Heke 70-80 lîreyî bidin em ê heta 10'ê şevê jî bixebitin."

BETLANEYA ZAROKAN BERHEVKIRINA MIŞMIŞAN E!

Arslan, derpêş kir ku bêyî ku qeymeqamtî li şert û mercên wan ên xebatê binihêre yewmiye diyar kirine û wiha axivî: "Karê mişmişan ji rezîltiyê pêvtir ne tu tişt e jî. Roj heye em heta 10'ê şevê dixebitin. Ji bo 50 lîreyî em ewqas eziyetê dikêşin. Çawa dibistan dikevin betlaneyê em tên. Zarokên din li ber behran betlaneyê dikin, ên min jî mişmişan berhev dikin. Çawa ku kar diqede jî dest bi dibistanê dikin. Yanî jiyana me rezîltî ye."

Odeya Çandiniyê jî piştrat kir ku li ser biryara Desteya Koordînasyina Bajêr a Meletiyê li tevahiya bajêr yewmiyeya karkeran wek 47 lîreyan hatiye diyarkirin.