MANÎSA - Serokê Komeleya Mafên Karkeran Mûstafa Derelî bal kişand ser armanca komeleyê û wiha got: "Em li hemberî xebata bê sîgorte, xebatên nerêxistinbûyî têdikoşin. Qet nebe jî em dixwazin karkeran serwext û bi rêxistin bikin."

Li navçeya Tûrgûtlû ya Manîsayê ji bo rê li ber neheqiyên ku karker bi wan re rû bi rû dimînin bê girtin 2 meh berê Şaxa Komeleya Mafên Mirovan a Karkeran hat avakirin. Di demeke kurt de komele ji bo gelek binpêkirinên mafan çareserî peyda kirin.

‘EM DIXWAZIN SERWEXT BIKIN'

Serokê Şaxa Komeleya Mafên Karkeran a Tûrgûtlûyê Mûstafa Derelî, anî ziman ku ji ber li Tûrgûtlûyê hejmara karkeran zêde ye wan pêdivî bi komeleyê dîtiye û her diçe ew bêtir tên nasîn. Derelî wiha domand: "Helbet ev naskirin bi xwe re pirsgirêk jî anîn. Em li hemberî xebata bê sîgorte, xebatên nerêxistinbûyî têdikoşin. Qet nebe jî em dixwazin karkeran serwext bikin. Ji bo em rêxistinbûyînê hêzdartir bikin, em bi gaveke hîn tenduristyane û hîn hêzdartir tevgeriyan."

‘EM DEMIDLEST MUDAXILEYÎ PIRSGIRÊKAN DIKIN'

Derelî, diyar kir ku her roj qanûnên ku mafên karkeran bin pê dikin tên derxistin û wiha axivî: "Tazmînata qidemî, saetaên xebat û mesaiyê, Pergala Teqawidbûna Şexsî (BES), mijarên destûrê û gelek mijarên din hene. Ji bo em li hemberî pêkanînên ku li dijî karkeran bisekinin me dest bi têkoşînê kir. Divê em di warê çîniyî de vê yekê bilind bikin. Bi feraseta tevgera çînî ya karkeran em dikarin ji derheqê vê yekê derkevin. Her wiha em demildest mudaxileyî pirsgirêkan jî dikin. Ji bo em xespkirina mafan kêmtir bikin û di warê mijarên huqûqî de em tim agahdariyên serwextbûnê dikin."

Derelî, diyar kir ku ev demeke kurt e wan komele vekiriye, lê ji niha ve ew encamên xebatên komeleyê bi dest dixin û di dozên ku ew dişopînin de jî pêşketin çêbûne û wiha domand: "Heftê 4-5 karker tên û pirsgirêkên xwe vedibêjin. Em bi wan re eleqedar dibin. Em rewşa wan lêkolîn dikin. Em wan serwext dikin. Ji her derdorê mirov tên. Divê her kes li pêyî mafên xwe be û ji bo vê bitêkoşe."

Derelî, diyar kir ku ji bo ew karkeran serwext bikin ew ê di rojên pêş de panelan li dar bixin û xebatên perwerdehiyê bi rê ve bibin û wiha axivî: "Em hemû tiştî bes ji bo karker nemirin dikin. Ji bo di qezayên karî de patron neyên fihêlkirin dikin. Me bi vekirina komeleyê re bingeha vê yekê avêt." Herî dawî Derelî hemû karkerên pêrgî neheqiyan tên vexwandin komeleyê.