STENBOL – 520 karkerên di Şaredariya Avcilarê de dixebitin, 2 meh e meaşên xwe nagirin ji ber vê 9 roj in di çalakiya kar berdanê de ne. Berdevkê karkeran Guvenç Oz got ku "Karkerekî hevalê me ji ber vê rewşê hewl da xwe bikuje."

Bi sedan karkerên di xebatên Miduryeta Park û Baxçeyan û Miduryeta Karên Fenê ya Şaredariya Avcilara Stenbolê de dixebitin, 2 meh e maeşên xwe nagirin û 9 roj in dest ji kar berdane û li mafê xwe digerin. Karker li Fîruzkoyê li ber şantiyeyê çalakiya xwe dewam dikin, dan zanîn ku sozên ku berê dane wan, bi cih neanîne û ji ber vê wan serî li vê rêyê daye.

Berdevkê Serokê Şaxa Hejmar 2 ya Belediye Îş Sendîkasi ya girêdayî Turk-Îşê Guvenç Oz diyar kir hinceteke ku maeşê karkeran dereng bixe tune û wiha axivî: "Di hevdîtina bi şaredar re, şaredar got ku 'aboriya şaredariyê ne baş e, bi vê ve girêdayî rewşa aborî ya li welat jî ne baş e û ev bandorê li ser Şaredariya Avcilarê dike.' Me ji wan re ragihand ku em vê yekê qebûl nekin, pêwîst bike em ê peywira xwe ya karkirinê neynin cih. Ji ber wê jî em 9 roj e di çalakiyê de ne."

'KESÊ TEV LI ME NABE BILA VEQETE'

Oz da zanîn ku Şaredara Avcilarê Handan Toprak Benlî carekê hatiye serdana wan û piştrast kiriye ku dê ev rewş 2-3 mehan dewam bike û wiha pê de çû: "Ji me re got ku 'Kesê vê rewşê qebûl nake, bila kerem bike rêya xwe ji me veqetîne'. 35 hevalên me dest ji kar berdan. Em di rewşeke wiha de ne û kes me cidî nagire." Oz destnîşan kir ku ew di biryara xwe de israr in û dê têkoşîna xwe dewam bikin û der barê rewşa hevalên xwe de jî ev tişt got: "Ji ber rewş xirab a aboriyê hemû hevalên me yên karker derûniya wan xirab bû. Ji ber vê mexdûryetê rojên borî hevalekî me xwest xwe bikuje. Niha rewşa wî baş e, lê derûniya wî xirab e."

Karkerê bi navê Alî Polat ê di Karên Fenê yên Şaredariyê de dixebite, diyar kir ku ew wekî karker dixwazin muameleya mirovî bibînin û wiha dirêjî da axaftina xwe: "Di pêvajoya 10 mehan de, me bi rêk û pêk maeşê xwe negirt. Her dem perçe perçe maeşê me dan me. Em nikarin pêwîstiyên zarok û malbata xwe jî pêşwazî bikin. Berî her tiştî muameleya mirovî pêwîst e."

Polat bal kişand ser hêza bi rêxistinkirî jî û piştrast kir ku ew ji şaredariyê jî û ji hikumetê jî bi hêztir in û ev tişt anî ziman: "Em wekî karker û gel hêj zêdetir bi hêz in. Dema em vê ferq bikin, hûn bawer bikin em dê bi ser kevin. Dibe berdêla vê hebe, ji xwe berdêl neyê dayîn dê tiştek bi dest nekeve. Mixabin ev pergala hemû cîhanê ye. Heke tu dixwazî tiştekê bi dest bixî, divê tu berdêlê bidî."

Karkeran aşkera kir ku heta daxwazên wan neyên qebûlkirin, dê çalakiyên wan berdewam bikin.