RIHA – Esnafên sanayiya Pirsûsê ji ber qeyrana aborî hatine asta ku deriyên dikanê xwe biqefilînin. Esnafan li dijî daxuyaniyên “Aborî di rewşek baş de ye” nerazîbûn nîşan dan û gotin rewşa ku ew tê de ne nayê dîtin.
Esnafên sîteya sanayiya navçeya Pirsûsa Rihayê ji ber qeyrana aborî derabeyên xwe digirin. Ji ber rewşa qirîza aborî welatî hatine asta ne karkirinê û esnaf li dijî vê bi bertek in. Abdullah Orçun ê ku li sanayiyê qeynaxê dike li dijî daxuyaniyên desthilatdariyê “Aborî di rewşek baş de” nerazîbûn nîşan da û wiha bersiv da: “Ka aborî li ku baş e? Heke ku rewşa aborî başbûya em ne di vê rewşê de bûn.”
EM ROJÊ BI 20 LÎREYAN ÎDARE DIKIN
Esnaf Ahmet Erkan ê ku li sîteyê MDF ên mobîlya difiroşe diyar kir ku beriya buhabûna dolaran karê wan baş bûye û piştî dolar buha bûn karê wan nebaşe. Erkan da zanîn ku ji ber bûhabûna MDF’iyan kes nakire û wiha got: “Ji ber bûhabûna MDF’an mobîlya jî bûha bûye û kes nakire. Berê kara me baş bû. Lê niha em rojê bi 20-25 lîreyan îdare dikin.”
ESNAF TÊN DEYNDARKIRIN
Hosteyê kaporta Adem Barik jî destnîşan kir ku ji ber bêkarbûnê sanayî naşibe sanayiye û ji ber bûhabûna dolaran nikarin kar bikin. Barik anî ziman ku malzemeyên ew bikar tînin ji ber bûhabûna dolaran bûha bûne û ji ber vê rewşê ya fiyetan bûha dikin an jî ji kirîna malzemeyan direvin. Barik wiha got: “Dema em fiyetan bûha dikin, mirov kaportayên xwe çênakin û bi têlan girê didin û pê îdare dikin. Neçarin vê yekê bikin. Naxwazin ji bibin deyndarê qerdên kredî.”
'LI KU BAŞ E?'
Qeynaxvan Abdullah Orçun jî diyar kir ku karê wan gelek baş bûye û wiha axivî: “Di nava demê de her tişt du sê qat bûha bû, em hatin wê astê ku nikarin kar bikin. Kes nikare debara xwe bike. Karê me gelek xerab e. Ji bo em kar bikin me fiyetên xwe aniye nîvî. Dema em fiyetê kêm dikin nikarin amûrên baş bikirin. Dema tiştê bê qalîte jî em bikirin mirov nikare karekî baş bike. Bi zehmetî em debara xwe dikin.” Orçun bersiv da daxuyaniyên hikûmetê yên “Rewşa aborî baş e” û wiha got: “Ka aborî li ku baş e? Heke ku rewşa aborî başbûya em ne di ve rewşê de bûn.”