AYDIN – Esnafên li Çarşiya Sergirtî ya Pêlavkarên Efelera Aydinê li rojên xwe yên berê digerin. Esnafên çarşiya dîrokî yek bi yek derabeyên dikanên xwe digirin û ketine pey derdê ku dê çawa nan û xwarinê bibin malê.

Esnafên li Çarşiya Sergirtî ya Pêlavkarên Efelera Aydinê ku nêzî sed sal in heye, li rojên xwe yên berê digerin. Li vê çarşiyê bi piranî malbatên xizan danûsitendinê dikin. Ji pêlavan bigire heta cihêzên bûk û zavayan lê peyde dibin. Her wiha li gel libas û pêlavan, eşyayên entîke û yên bi destan tên çêkirin jî lê tên firotin. Li gel mişteriyên heremî her sal turîst jî tên vir û digerin. Salên berê di nav esnafan de gotina “Tu xweliyê biavêjî li erdê nakeve” dihat gotin. Lê îsal li çarşiyê bêdengî serdest e û haya kesî ji vê çarşiya rengîn nîne.

'EV 5 SALE ÇARŞÎ VALA YE’

Îbrahîm Keskîn ê ku 30 sal in li çarşiyê esnftiyê dike ji ber ku kes nayê çarşiyê û karê wan nabe bi gazinc e. Keskîn da zanîn ku gel ji ber krîza aborî nikare bê çarşiyê û wiha got: “Ev 5 sale çarşî vala ye. Zivistan û havînê ferq nake. Ji ber firotin nabe rewşa me aborî jî ber bi nebaşbûnê ve diçe. Em nikarin beran bikirin. Berê turîst jî dihatin. Lê mixabin niha tu kes nayê. Berê herî kêm min 40 pêlav difirotin, lê niha heta êvarê tenê 3-5 pêlavan dikarim bifiroşim. Divê êdî ev pirsgirêk bê çareserkirin. Heke wisa biçe em ê kargehên xwe bigirin.”

'HETA EM DIKARIBIN EM Ê LI BER XWE BIDIN’

Esnaf Aytekîn Ocal jî ku hilberînên cêr û sifir jî difiroşe dest nîşan kir ku ji ber êrîşan êdî turîst nayên Tirkiyeyê û her roja ku diçe hilberîn bûha dibin. Ocalan wiha domand: “Wek ku hûn dibînin çarşî vala ye. Zem hatiye ser sifir jî. Ji ber vê em nikarin malên di dest xwe de jî bifiroşin. Li cihekî dîrokî rewşa esnafan nebaş e. Em nikarin bacên xwe bidin. Em nikarin nêzî Bag-Kurê bibin. Çimkî em nikarin razemeniyê bikin. Gelek esnafan dikanên xwe girtin. Em jî heta ku bikaribin li ber xwe bidin em ê vekiribîn.”

'GELO EZ Ê SIBÊ BIKARIBIM NAN BIBIM MALÊ?'

Ocal diyar kir ku li Tirkiyeyê desthilatdarî tenê berjewendiyên xwe difikire û wiha got: “Tenê desthilatdarî xwe difikire. Divê ku hinek rewşa esnafan jî bifikirin. Heke wisa bibe wê baştir bibe. Ji ber ku li vî welatî meseleya jêr û jor heye ji bo me tiştek nayê kirin. Hinek li cihên xweş in, hinek jî tên eciqandin. Yên li asta jor dibêjin ‘ez ê sibê çend hezar dolar qezenc bikim.’ Yên tên eciqandin jî ketine derdê ‘ez ê dikaribim sibê nan bibin malê?’ Divê demildest ev rewş bê sererastkirin.”