EDENE/ANTALYA – Li Edene û Antalyayê zebeş û petêxên ku nayên firotin li nava zeviyan xera dibin. Bi hezaran dolim bostanê zebeş û petêxan xera bûn. Cotkarên bostanan petêx û zebeşên xerabe didin sewalan. Cotkar difikirin ku wê çawa zirara xwe çareser bikin û deynê gubre û mazotê bidin.
Li Edene û Antalyayê cotkar tu xêr ji zeviyan nedîtin. Di rojên dawî de ji ber germa zêde zebeş û petêxên bostanan xera dibin. Cotkarên li Edenê aşkere dikin ku wan bi destpêka demsalê re kîloya zebeşan bi 80 qurişî difirot, lê niha bi 15-20 qurişan jî nayên firotin û zebeş hemû di destê wan de mane û dibin êmê sewalan. Cotkarên Antalyayê jî dan xuyakirin ku petêxên wan li zeviyan hemû dihelin û xera dibin. Cotkaran anîn ziman ku ji ber nayên firotin li nava zeviyan dimînin û ji ber germahiyê xera dibin. Cotkarê zebeşan Reşît Ertaş diyar kir ku ji ber germa zêde hemû zebeşên wan li nav erd mane. Ertaş da zanîn ku wî 130 dolim zebeş çandiye û wiha got: “Niha hemû zebeş xera dibin. Em nikarn bifiroşin. Gelek cotkarên mîna min zirarê dikin. Ev zebeş nayên xwarin. Me jî wisa berdaye. Şivan sewalên xwe berî nav zeviyê didin. Ji 130 dolim bostanê zebeşan me zebeşek jî nefirot.”
'HEMÛ XERA BÛN'
Ertaş dest nîşan kir ku maliyeta zebeşan li ser wan pir bûha çêbûye û nikarin deynên xwe jî razînin û ketine derdê dê çawa ji bin deynan derbikevin. Cotkar Yîgît Tay jî diyar kir ku hemû zebeşên wî xera bûne û wiha got: “Ev zebeş nayên xwarin. Êdî wê sewal van zebeşan bixwin. Ez li nava 130 dolim erd geriyam, tenê min çend zebeşê saxlem dît.”
'EM HÊVÎ DIKIN KU ZIRARÊ NEKIN’
Halîme Okay jî anî ziman ku ji bo zebeşê wan ji ber germa Edeneyê xera nebin rûpelên rojnameyan li wan dipêçin û di bin vê germê de hem ew hem jî zebeşên wan dirizin. Okay got ku ew hêvî dikin ku dê bikaribin zebeşên xwe bi buhayek baş bifiroşin û zirareke mezin nekin.
LÊÇÛNA XWE JÎ DERNEXIST
Cotkarê bi navê Mustafa Yildiz ê li Antalya jî çandiniyê dike da zanîn ku nêzî 20 hezar lîre lêçûn li 15 dolim zevî kiriye û ji ber germê wî di petêxan de zirar kiriye.
'ME ZEBEŞEK JÎ HILNEDA’
Fatma Kaynak jî anî ziman ku bi salane ew cotkariyê dike û wiha axivî: “Me dolim bi 160 TL’yî îcare kiriye. Me 70 dolim zebeş çand. Serê dolimê 40 lîre bûhayê avdaniyê ye. Ji vê zeviyê 130 ton zebeş dihat berhevkirin. Em dixwazin dewlet li hewara me were. Me gelek lêçûn kir. Me gelek ked da lê me tiştek jê wernegirt. Li gel ewqas tahb û kedê me zebeşek jî jê hilneda.”
'PETÊXÊN ME HELIYAN’
Erhan Polatli jî diyar kir ku 12 sal in ku wî germek wisa bi bandor nedîtiye û ji ber germahiya zêde 10 dolim petêxên wî heliyane û riziyane. Polatli da zanîn ku salên ne germ ewqas zêde nebû 5 ton petêx ji vê zeviyê berhev dikir û ji ber germahiya zêdebi awayekî zêde xisirîne.