STENBOL - Sekreterê Giştî yê 2'yemîn ê Komeleya Veguhêzkaran a Tirkiyeyê Hakki Başman, anî ziman ku li gor salên berê her diçe qezenca wan kêm dibe û wiha got: "Li Tirkiyeyê tenê meriv li rewşa veguhêzkaran binihêre dê bê fêmkirin ku rewşa aboriyê nebaş e."
Li gor daneyên Saziya Îstatîstîkê ya Tirkiyeyê (TUİK); di mehên Çile û Gulanê de kirîna ji derve ji firotina ji bo derve ji sedî 15.7 zêdetir e û ev teqabulî 24.8 milyar dolarî dike. Gelek sektor nesîbên xwe ji vê dîmenê wergirtin. Yek ji van sektoran jî vehuêzkarî ye. Komeleya Veguhêzkaran a Tirkiyeyê ku li Stenbolê fealiyetên xwe bi rê ve dibe û 130 kargeh endamê wê ne, diyar kir ku bi bertengiya aboriyê re li gor salên berê qezenca wan zaf kêm bûye.
‘QEZENC KÊM BÛ, LÊÇÛN ZÊDE BÛN'
Sekreterê Giştî yê 2'yemîn ê Komeleya Veguhêzkaran a Tirkiyeyê Hakki Başman, diyar kir ku dema kargehên biçûk û navîn bixebitin veguhêzkar jî dixebitin. Başman, qada Ambarlarê ya li Zeytînbûrnûyê qesd kir û wiha got: "Hema bêje ev der borseya esnafan e. Meriv li gor liv, tevger û westdariya vir dikare li nebza piyaseyê binere. Li gor berê kar zaf kêm bûye. Rewşa fîrmayên biçûk qet nebaş e." Başman, dest nîşan kir ku her diçe qezenca wan kêm dibe û lêçûnên wan zêde dibin û bi zema sotemenî û heqê riyan lêçûnên wan zêdetir bûne.
HER SAL XWEZÎ BI PAR
Başman, da zanîn ku di mehên Cotmeh-Mijdar-Kanûn ên sala 2015'an de rojê 2018 kamyon û 103 TIR ji Zeytînbûrnûyê derdiketin û wan li gor hin serdemên salê îstatîstîka wesayîtên ku ji sîteyê derdiketin nîşe digirt. Başman, dest nîşan kir ku di mehên Cotmeh-Mijdar-Kanûnê yên sala 2016'an de jî rojê 202 kamyon û 97 TIR derketine û di Gulana 2017'an de ev hejmar bi nêvengî daketiya 176 kamyon û 77 TIR'an.
Başman, dest nîşan kir ku di demên dawî de ji sîteyê hejmara derketina wesayîtan kêm bûye û wiha diyar kir: "Yanî tenê meriv li rewşa veguhêzkaran binihêre dikare fêm bike ku li Tirkiyeyê rewşa aboriyê ne tu rewş e. Berê esnafan mal stok dikir, lê belê niha stokê nake."
'JI BER ZEM Û BACAN EM QEZENC NAKIN'
Ajokarê TIR'ê yê 32 salan Mûstafa Barbaros jî, dest nîşan kir ku ji ber zem û bacan êdî ew tiştekî qezenc nakin. Barbaros, anî ziman ku wî berê ji Nîgdeyê ber bi Stenbolê vê mehê 5 sefer dikirin, lê belê ev saleke ku mehê ew 2 seferan dike.
Ajokarê bi navê Halil Erçel jî, dest nîşan kir ku karê wan kêm bûye û balê kişand ser krîza aborî.