EDENE - Cotkarên firengiyan ji ber bayê bakur û erzaniya firengiyan bêzar in. Firengiyên wan nayên firotin tev di nava zeviyan de xera bûn. Cotkaran diyar kir ku nikarin deynê mazot û gubre jî bidin.

Cotkarên firengî, zebeş û petêxan îsal ji ber şertê hewayê û polîtîkaya aboriyê zirarê dikin. Cotkarên ku ji ber nikarin berên xwe bifiroşin firengî, zebeş û petêxên wan tev di dava baxçe û bostanan de xera dibin. Cotkarên ku firengiyên wan di nava zeviyan de xera bûn diyar kirin ku nikarin deynê gubre û mazotê jî bidin. Firengên ku di destpêka havînê de kîloya wan heta 7 TL'ya jî çû, niha nayên firotin. Rencberên di bin deynan de man, kûr kûr difikirin û bi gazinc in. Cotkarên ku nikarin firengan bifiroşin li aliyekî bi fikarin, li aliyê din jî nikarin heqê karkerên ku firengan li nava zeviyan kom dikin jî bidin. Karkerên ku li ber germa havînê firengan kom dikin, firengan dixin kaseyan û pakêt dikin. Cotkar û karkerên firengan yên beriya Tuzlayê îsal ji ber rewşa hewayê û politikayên dewletê bêzar in.

Çotkarê firengan Hamdîn Akçakoca diyar kir ku îsal 2 hezar û 800 TL mesref li zeviya frengan kiriye û wiha got: "Li herêma Çukurovayê fireng, zebeş û petêx ji ber germa zêde di nava zeviyan de xera bûn û bi axê de teqiyan. Îsal ji sedî 60 firengî di nava zeviyan de xera bûn. Her sal me serê dolimê 6 ton kom dikir. Îsal min 2 ton kom kirin. Hem ji ber hewayê tev xera bûn û hem jî em kîlo bi 30-50 qurişî difiroşin. Hem erzan e û hem jî bereket kêm e. Maliyeta kîloya firengan bi 50-60 qurişî ye. EM îsal zêde zirarê dikin û em nikarin deynê xwe bidin."