WAN - Tûran Teke ku 10 sal in li Wanê di Newroz, 8'ê Adarê û rojên taybet de kiras û fîstanên jinan didirû, diyar kir ku krîza aborî ku bi OHAL'ê re her diçe kûrtir dibe bandoreke neyînî li karê wan jî kiriye û ev saleke hema bêje hejmara kirîgerên ku tên nêvî nêvî daketiye.

Tûran Teke ku li Kolana Cûmhûriyet a navçeya navendî ya Hevrişîmê ya Wanê kiras û fîstanên gelêrî çêdike, diyar kir ku ew di Newroz, 8'ê Adarê û rojên taybet de li gor modela tê xwestin kincan didirû. Teke, anî ziman ku krîza aborî ya bi Rewşa Awarte (OHAL) re her diçe kûrtir dibe bandoreke neyînî li karê wan jî kiriye.

‘HERÎ ZÊDE BANDORÊ LI ESNAFÊN BIÇÛK DIKE'

Teke, ku 10 sal in esnaftiyê dike, cawên xwe ji Hîndistan, Pakistan û welatên din tîne. Teke, anî ziman ku ev saleke hejmara kirîgerên ku dihatin dikana wî kêm bûye. Teke dest nîşan kir ku krîz herî zêde bandorê li esnafên biçûk dike û wiha got: "Em rojê nêzî 6 kiras û fîstanan didirûn. Karê bavê min e. Havînan roj heye em 130 metre caw difiroşin. Berê me zêdetir difirot."

Teke, balê kişand ser nexşên kevirî yên li ser cawan û wiha got: "Mirovên li wir di hefteyekê de van neqşan çêdikin. Ev kinc bivênevêyên dawetên Wanê ne. Dawet sê rojan dom dikin û her roj kincên cuda li xwe tên kirin. Her wiha bivênevêyên cihêzên bûkan e jî. Di her cihêzê de herî kêm 40 metre caw heye." Teke, anî ziman ku divê kincên gelêrî tenê ne di rojên taybet de her roj bên lixwekirin.