ANTALYA – Îsal jî hêviya ku esnafên Antalyayê ji turîzmê dikir, berba bû. Esnafan nûçeyên der barê başbûna rewşa turîzmê de derewandin û gotin ku "Berî ku dewlet bêje 'rewşa tûrîzmê baş e' bila bê li halê esnafan mêze bike." Esnafan piştrast kir ku êdî tûrîzm baş nabe û tu hêviya wan nemaye.
Sala çûyî ji ber ku tûrîstên rûs nehatin, pişta esnafê Antalyayê şikest. Esnafên Antalyayê dan zanîn ku krîza tûrîzmê ya heyî ji ber gengeşiyên bi Ewropayê diqewime. Esnafan, dest nîşan kir ku wan sezona 2016'an bi zirarê girtiye û îsal jî rewş hêj kambaxtir e. Di serî de polîtîkaya hikumetê ya Rojhilata Navîn, polîtîkaya derve jî hat rexnekirin. Esnaf di wê baweriyê de ne, ku dê setkora tûrîzmê bi pêş nekeve.
'HEKE TURÎST NEYÊN KAR JÎ TUNE YE'
Ahmet Ozbek li Kemerê esnafiyê dike û ev herêm cihê tûrîzmê ye. Ozbek got ku "Îsal rewşa sektora tûrîzmê ne tu rewş e. Ne tûrîst û ne jî kar heye" û wiha domand: "Ji ber ku tûrîst nayên em nikarin kar bikin. Sedema nehatina tûrîstan jî gengeşiya li welat e. Dîsa pirsgirêkên di navbera Ewropa û Tirkiyeyê de jî bandorek xirab li me dike. Her çendî pirsgirêkên di navbera Rûsya û Tirkiyeyê de piçekî çareser bûn jî, lê tu guhertin çê nebû." Ozbek da zanîn ku esnafan sezona 2016 û 2017'an girtiye û ew bawer nakin ev pirsgirêk çareser bibe û aşkera kir ku esnaf êdî derabeyên xwe datînin.
‘EM QET KÊFXWEŞ NÎNIN’
Dursun Arslan yek ji esnafê li navendê ye û diyar kir ku rewşa karê wan gelekî xirab e û ev rewşa di sektora tûrîzmê de tu hêviyê nade esnafan. Arslan nûçeyên wekî "Tûrîzim sererast bû, tûrîzmê bi pêş dikeve" jî derewandin û dest nîşan kir ku tu rastiya van nûçeyan tune ye. Arslan wiha axivî: "Rojname çi dinivîsin bila binivîsin, di rewşa me de tu guherîn çênebûne. Niha rewşeke rezîl û riswa heye."
Arslan sedema nehatina tûrîstan jî bi polîtîkya hikûmetê ve girêda û wiha axivî: "Gengeşiya siyasî ya li welat û siyaseta bi derve re tê meşandin, pirsgirêkan bi xwe re tîne. Heke polîtîkaya derve bi vî şeklî dewam bike, em ê îflas bikin."
Esnafê bi navê Ercan Kaymaz jî piştrast kir ku her roja ku diçe karê wan xirab dibe û wiha got: "Bila dewlet bê û rewşê bibîne, wê demê bêje ka tûrîzim baş e an na."