ANTALYA – Sinhetkarên li Çarşiya Balikçilar a Antalyayê dimînin, ji ber nebûna kar zaf tengasiyan dikişînin. Esnafan aşkera kir ku ew zehmetiyên krîzê dikişînin û wiha gotin: "Me îsal ji sedî sed winda kiriye."

Sinhetkarên li çarşiyên Demîrcîler û Sobacilarê ya navçeya Muratpaşa ya Antalyayê, ji ber nebûna kar bi prisgirêkên mezin re rû bi rû dimînin. Ev çarşî xwedî dîrokeke dûr û dirêj e. Li vê çarşiyê qelayî, nalbend, karê sifir, kilîm, qewartina kevçiyan û gelek karên destan tên kirin. Dursun Satici 40 sal e bi pîşeyê bav û kalan debara xwe dike û bi karê sifrê re eleqedar e. Satici aşkera kir ku pîşeya wî bi tunebûnê re rû bi rû ye.

'HETA ÊVARÊ RÛDINÊN'

Satici dest nîşan kir ku ew bi karên wekî bivir, das û hwd. re eleqedar dibin û wiha axivî: "Berê turîstên ku dihatin, eleqeyeke mezin nîşanî karê me didan. Karê sifirê û neqiş gelekî bala turîstan dikişand û zêde dikirîn. Piştî derz li turîzmê ket, êdî karê me jî nebû. Ev demeke hema bêje heta êvarê ji xwe re rûdinên."

'ME ÎSAL JI SEDÎ SED WINDA KIRIYE'

Ahmet Ozcan jî da zanîn ku ew 20 sal e bi karê sifrê re eleqedar dibe û ji sifrê berhemên wekî tablo, têfik û wêneyan derdixe. Ozcan diyar kir ku karê sifrê karekî kedê ye û ji bo wê dem divê. Ozcan wiha got: "Bi salan e vî karî dikim, lê tu demê firotin ew qas xirab nebûbû. Sala çûyî me ji sedî 60 winda kir, lê îsal me ji sedî sed winda kiriye."

Ozcan dest nîşan kir ku ev zehmetî zehmetiyên krîzê ne û wiha domand: "Rêveberiya li Tirkiyeyê, welat ber bi kaosê ve dibe û aborî serobin kirin. Zehmetiyên aborî û krîzê em dikişînin. Dîsa ji ber krîza dîplomasiyê, turîst nayên welat, dema turîst neyên, kirîn jî kêm dibe."