ENQERE – Hevseroka Giştî ya HDP’ê Serpîl Kemalbay komkujiya Barselonê ku 13 kesan jiyana xwe ji dest dan û 100 kes birîndar bûn şermezar kir û banga piştevaniyê li derdorên li dijî DAIŞ’ê têdikoşin, kir.

Hevseroka Giştî ya Partiya Demokratîk a Gelan (HDP) Serpîl Kemalbay têkildarî komkujiya ku DAIŞ'ê li bajarê Barselonê ya Îspanyayê pêk anî, daxuyanek nivîskî weşand. Di daxuyaniyê de wiha hat gotin: “Yek ji êrîşên DAIŞ’ê yên li dijî nirxên mirovahiyên gerdûnî û sivîlan li Barselonê pêk hat. Em komkujiya 13 kesan jiyana xwe ji dest dan û 100 jî birîndar bûn, bi tundî şermezar dikin. Em bi hestên kûr, êşa gelên Îspanyayê parve dikin. Dewletên piştgiriyê didin hişmendî û avakirinên mîna DAIŞ’ê ku li hemû cîhanê komkujiyan pêk tînin, sûcên mezin dikin. Ji Beyrutê heya Reyhanliyê, ji Pirsûsê heya Parîsê, ji Bexdayê heya Kobaniyê û ji Raqqayê heya Tunus û Enqereyê DAIŞ di erdnîgariyek mezin de sûcê mirovahiyê kiriye. Girînge ku em li dijî hêzên wiha di nava piştevaniyekê xurt de bin û bi hevre têbikoşîn."