ÎZMÎR – Parlamentera CHP'ê yê Îzmîrê Zeynep Altinok diyar kir ku daxwaza edaletê ya li Tirkiyeyê veguheriye raperînê û bal kişand ser nîqaşên "girtina" Serokê Giştî yê CHP'ê Kemal Kiliçdaroglu û aşkera kir ku ew ihtimalê nade tiştekî wiha, lê li Tirkiyeyê her tişt pêkan e.

Parlamentera CHP'ê ya Îzmîrê Zeynep Altinok der barê Nobeda Wijdan û Edaletê ya ku HDP'ê li Amed, Wan, Stenbol û Qada Gundogduyê ya Îzmîrê daye destpêkirin û der barê mijarên di rojevê de nêrînên xwe parve kir. Altinok nobeda HDP'ê wekî "Qadeke hevpar a nû" pênase kir û ev tişt got: "Wekî hûn jî dizanin, di Meşa Edaletê de jî gelek aliyan cih girt û bû xaleke hevpar a edaletê. Ji ber ku di gelek qadên cuda de, gelek aliyên cuda cih girtin. Êdî bêedaletiyên gelek mezin di taxên desthilatdariyê de jî derdikevin holê. Li gel vê bêedaletiyê gelek zext û zordarî ji hêla rejîmê ve tên kirin."

‘DAXWAZA EDALETÊ VEGUHERÎ RAPERÎNÊ’

Altinok aşkera kir ku piştî Meşa Edaletê, Nobeda Wijdan û Edaletê jî veguheriye raperînê û wiha axivî: "Piştî Meşa Edaletê, destpêkirina Nobeda Wijdan û Edaletê ya li gelek herêmên welat jî gelek bi qîmet e. Ji bo ev daxwaza heyî hêj şênber bibe, divê di qadeke wekhev de bê berdewamkirin."

‘EM MAFÊ XWE YÊ BERXWEDANÊ BI KAR TÎNIN’

Altinok a ku bavê wê yê helbestvan Metîn Altinok di Komkujiya Sêwasê de hat qetilkirin, 20 sal e têkoşîna "Edaletê" berdewam dike û dixwaze kujerên Komkujiya Sêwasê bên cezakirin û piştrast kir ku hêj ev daxwaza wan a edaletê nehatiye bersivandin. Altinok got ku bi meş û nobetên ku li Tirkiyeyê tên lidarxistin, dê edalet tecellî nebe û wiha pê de çû: "Berî her tiştî divê ev daxwaz ji hêla hemû beşên civakê ve bê erêkirin û bi hev re wekî xwişk û bira berdewam bike. Divê bi biryar bê berdewamkirin. Em demokrasî û darazeke edilane û di nava aştiyê de jiyanê dixwazin. Em gelek tiştan naxwazin. Divê em van daxwazên xwe li dijî desthilatdariyê dubare dubare bînin ziman. Divê em mafê xwe yê berxwedanê bi kar bînin."

LIJNEYA EDALETÊ YA CHP’Ê

Altinok bal kişand ser Lijneya Edaletê ya CHP'ê jî û da zanîn ku dê lijne bi hevpariya raperîna edaletê bê nirxandin û ev tişt got: "Ji bo ev raperîn şênber bibe, gelekî girîng e. Dê daxwazên şênber li Tirkiyeyê çawa pêk bên, dê li dijî polîtîkayên xelet helwesteke çawa bê girtin, pêşniyarên çareseriyê bên kirin.

‘IHTIMALA KU KILIÇDAROGLU BÊ GIRTIN TUNE’

Altinok bal kişand ser axaftinên Serokê Giştî yê AKP'ê Tayyîp Erdogan ên wekî "Dê Kiliçdaroglu bê girtin?" jî û piştrast kir ku li Tirkiyeyê her tişt pêkan e û wiha dirêjî da axaftina xwe: "Ez ihtimalekê nadim rewşeke girtinê ya Kiliçdaroglu. Heke Kiliçdaroglu bê girtin, dê AKP bi pêvajoyeke zehmet re rû bi rû bimîne."

Altinok li ser hevgirtinên hilbijartina 2019'an jî rawestiya û da zanîn ku piştgiriya civakî, bi daxwaza mafê berxwedanê ve şênber bibe dikare bibe daxwazeke hevpar û gavên girîng bi xwe re bîne. Altinok aşkera kir ku nîqaşên ku tên kirin, ne hevgirtinek e û diyar kir ku berî hevgirtineke hilbijartinê, divê hevgirtineke civakî pêk were.