AMED - Amedspor a ku di 2'yemîn Lîga Koma Spî ya Spor Totoyê de di rêza yekemîn de ye Sêwas Belediyaspor 2-1 têk bir. Amedspor û alîgiran serkeftina xwe diyarî Serokê Baroya Amedê Tahîr Elçî yê hate qetilkirin kirin.

Amedspor a ku di 2'yemîn Lîga Koma Spî ya Spor Totoyê de di rêza yekemîn de ye di hefteya 14'emîn de li Tesîsên Sporê yê Seyrantepeyê Sêwas Belediyespor kir mêvan. Di turîbinan de wêneyê Serokê Baroya Amedê Tahîr Elçî yê par di 28'ê Mijdarê de li ber Mînareya Çarling hate qetilkirin li ser "Em ê te jî bîr nekin" hatiye nivîsandin hat vekirin. Rêveberên Amedsporê, Serokê Baroya Amedê Ahmet Ozmen, hevsera Tahîr Elçî turkan Elçî û gelek parêzer musabaqa temaşe kirin. Hin alîgirên ku nekarîn bikevin stadê jî li ser quleya avê temaşe kirin. Jin û zarok jî di turîbînan de cihê xwe girtin.

Di musabaqayê de dirûşmên "Tahîr Elçî bêmirin e" "Şehîd namirin" "Ji bo Tahîr Elçî bi ser ekvin" hatin berzkirin û tîlîlî hatin kişandin. Koma Dîrenîş a Amedsporê jî di kareografiya ku amade kir de wêneyê Tahîr Elçî yê li ser asîmanan baskên wî heye vekirin.

Amedspor bi golên ku Denîz Nakî di deqîqeya 19'emîn de avêt derbasî pêş bû, di deqîqeya 27'emîn de ji tîma mêvan Abdurrahman Kuyucu gol avêt. Di beşa duyemîn a musabaqayê de di deqîqeya 59'emîn de ji Amedsporê Yusuf Yagmur gol avêt û Amedspor 2-1 bi ser ket.

Piştî ku musabaqa bi dawî bû hin alîgirên Amedsporê xwestin bikevin stadê lê futbolbaz û rêveberan ew derxistin derve. Herî dawî alîgiran strana "Dîren ha Diyarbekîr dîren" bi hevre stran.

Dîsa Denîz Nakî wêneyê Tahîr Elçî girt û selfie kişand.

Amedsporê puanê xwe kir 30 û rêza xwe ya yekemîn parast.