MÊRSÎN – Serokê Komeleya Şanoyê ya Mêrsînê Salîh Yildirim bertek nîşanî bihabûna salonên şanoyê ya şaredariyê da û wiha got: “Heke ku şaredariyên Mêrsînê ji kesên hunerê diafirînin re nebe alîkar, dê tu ferqa wan şirketên bazirganiyê nemine. Divê ku şaredarî bihabûna salonan daxîne.”
Li Mêrsînê gelek komên şanoyê ku xebatên xwe didin meşandin ji bo pêşandana şanoyê salonan nabînin. Şanoger ji ber bihabûna kirêkirina salonên şaredariyan bi gazincin û nikarin pêşandana lîstikên xwe bikin. Serokê Komeleya Şanoyê ya Mêrsînê Salîh Yildirim li hember bihabûna kirayên salonan bertek nîşan da û got ku divê rêveberiyên herêmî destek bidin komên herêmî yên şanoyê.
'KIRÊKIRINA SALONAN PIR BÛHA YE’
Yildirim da zanîn ku her sal di mehên havînê de gelek lîstik derdikevin ser dike û ji ber salonên şanoyê îsal bûha ne sezona şanoyê sekiniye. Yildirim diyar kir ku ji ber organizasyona bazirganan kirayên salonan bûha bûne ev yek li ser wan bandor dike û wiha got: “Ev fiyat ji bo komên herêmî yên şanoyê gelek gûha ye. Şanoger nikarin heqê salonan bidin. Şaredarî ji bo xizmeta gel hene. Divê ku şaredarî xizmeta şanoyên herêmî jî bifikire. Di organîzasyonên bazirganiyê de bilet bi 80 lîreyî tên firotin. Lê di pêşandana şanoya komên herêmî de bilêt bi 10-20 lîreyan tên firotin. Gelek cudahî di navberê de heye.”
‘DIVÊ ŞAREDARÎ DESTEKÊ BIDIN HUNERÊ’
Yildirim di berdewama axaftina xwe ev tişt got: “Heke ku şaredariyên Mêrsînê ji kesên hunerê diafirînin re nebe alîkar, dê tu ferqa wan şirketên bazirganiyê nemine. Pêwîste ku şaredarî dev ji van helwestên xwe berdin. Divê ku şaredarî bihabûna salonan daxîne.” Yildirim destnîşan kir ku bi taybetî li Mêrsînê rêveberiyên herêmî destekek xurt bidin komên şanoyên herêmî û di vê çarçoveyê de yekîneyên çand û hunerê yên şaredariyan jî karê xwe bicih naynin. Yildirim nêzîkatiya şaredariyan a li hember çand û hunerê rexne kir û got ku ew muhataban nabînin ku derdê xwe jî vebêjin.
'QEYÛM DERIYAN LI ME GIRT’
Yildirim bibîr xist ku şaredariya DBP’î ya Akdenîzê beriya qeyûmê bi fiyatên guncav salonê dida wan û piştî tayînkirina qeyûmê şaredariyê hemû deriyên xwe ji şanogeran re girt. Yildirim da zanîn ku ji bo pêşketin û belavbûna çand û hunerê pêdivî bi salonan heye û xwest ku daxwazên wan li ber çavan bên girtin.