MÊRSÎN - Muzîkjenên kolanan ên Mêrsînê ku Atolyeya Hunerê ya Xweser ava kirine, ji bo zarokên ji ber şerê Sûriyeyê berê xwe dane Mêrsînê, perwerdehiya muzîkê didin.
Muzîkjenên Kolanan ên Mêrsînê ku hatin cem hev û Atolyeya Hunerê ya Xweser ava kirin, piştî demekê navê xwe li her derê belav kirin. Hunermendên ku atolye ava kirin, ji bo zarokên ji şerê Sûriyeyê reviyan û hatin li Mêrsînê bi cih bûn perwerdehiya muzîkê didin. Muzîkjen, ji bo zarokên rewşa wan nebaş, bi armanca piştgiriya derûniyê dest bi perwerdehiya muzîkê kirin. Dê piştî perwerdehiya muzîkê, muzîkjen ji zarokan koma koroyê ava bikin û konseran li dar bixin.
EM DIXWAZIN HUNERÊ LI HER DERÊ BELAV BIKIN
Yek ji sazumankarên Atolyeyê Bican Ozgur Ozturk, diyar kir ku di şertên îro de mirov tenê bi pereyan dikare bigihêje hunerê, lê armanca wan ew e ku hunerê bibin her derê û hunerê bigînin her kesî. Ozturk, anî ziman ku ji bo hunera alternatîf ketin nava liv û tevgerê û dixwazin hunera muzîkê bigihînin her qadê û wiha got: "Armanca vê atolyeya hunerê ew e ku em muzîkê bibin her kolanê. Em dixwazin hunera muzîkê bibin kolan û taxên derdorê. Em dixwazin perwerdehiya muzikê bidin van zarokan. Ji ber ku di şertên îro de ji bo perwerdehiya muzîkê pereyekî zêde tê xwestin. Em dixwazin bi pirojeyên xwe hem zarokan û hem jî mezinan perwerde bikin. Em dixwazin bi nifşên nû re biafirînin. Di vê atolyeyê de dê bêtir zarokên Sûriyeyî bên perwerdekirin. Ji ber ku bêtir pêdiviya wan bi perwerdehiyê heye. Em dixwazin bi muzîkê û perwerdehiya muzîkê piştgiriya derûnî bidin wan û bi civakê re bikelijînin. Dema em li kolanê hunera muzîkê dikin, herî zêde zarokên ji şer hatine eleqe nişan didin. Zarokên mexdûrên şer eleqe nîşan didin. Ji ber vê yekê herî zêde pêdiviya wan pê heye. Em dixwazin bi vê perwerdehiya muzîkê ya li atolyeyê wan tev li civakê û hunerê bikin."
'EM PIŞTGIRIYÊ JI HER KESÎ DIXWAZIN'
Sazumankarê Atolyeyê Ferhat Nas jî anî ziman ku huner derûniya mirovan aram dike û baş dike û wiha got: "Zarokên ji şerê Sûriyeyê hatin pêdiviya wan bi aramiyê û derûniya baş heye. Em bawer dikin ku ev atolyeya muzîkê dê bêtir bibe derman ji bo derûniya wan. Ji bo piştgiriya zarokan em bang li hemû hunermend û hemû beşê civakê dikin ku her kes destê alîkariyê dirêjî me bike."