WAN - Keşîşxaneya Sûrp Grîgor û Dêra Qerapêtê ku li gundê Kolanîsê yê navçeya Rêya Armûşê ne ji ber bêxweyîtiyê tune bûn. Her wiha defînger jî derdora dêrê dikolin û wê texrîb dikin.

Li gundê Kolanîsê yê girêdayî navçeya navendî Rêya Armûşê ya Wanê ye û li quntara Çiyayê Erekê ye, Keşîşxaneya Sûrp Grîgor û Dêra Qerapêtê terkî çarenûsa xwe hatine kirin. Di malpera Gerînendetiya Çand û Turîzmê ya Bajêr a Wanê de navê keşîşxane û dêrê tune ye. Di wêneyên ku di sala 1923'an de hatine kişandin de keşîşxane û dêr saxlem dixuyên û ji wê çaxê heta niha tenê dîwarekî keşîşxaneyê li ser piya maye.

Di çavkaniyên ermeniyan de der barê keşîşxaneya Sûrp Grîgorê de tê nivîsandin ku, 14 kîlometreyan li rojhilatê Wanê li quntara bakur a Çiyayê Erekê cih digire û bi meşê bi qasî 3 saetan dûrî navenda Wana kevn e. Ji ber ku perçeyên mezin ên keşîşxaneyê belav bûne, tê texmînkirin ku di rûxandina wan de teqemenî hatine bikaranîn. Tê diyarkirin ku xêzkirinên anketî yên keşîşxaneyê di sala 1913'an de ji aliyê Walter Bachman ve hatine çêkirin.

DÊRA SÛRP QERAPÊTÊ DI SALA 1251'Ê DE HATIYE ÇÊKIRIN

Li gor çavkaniyan tê diyarkirin ku Dêra Sûrp Qerapêtê jî di sala 1251'ê de hatiye çêkirin. Di sedsala 16'emîn de di şerên Osmanî-Îranê de zirar dîtiye û di sala 1559'an de ji aliyê ermeniyekî bi navê Ghilidjan ve hatiye selihandin.

Niha ji keşîşxane û dêrê tenê dîwarên rûxandî û hin kevirên nexşkirî mane. Her wiha gundiyên hawirdorê hin kevirên dêr û keşîşxaneyê di dema çêkirina xaniyên xwe de bi kar anîne. Kevirekî ku li ser nivîs hene û aîdî Dêra Qerapêtê ye, serdevkî li ber kaniyeke gund e. Defîngerên ku derdora keşîşxaneyê qulopilo kirine hîn jî kolandinên xwe didomînin.

‘HÎN JÎ DIKOLIN'

Welatiyekî 65 salî ku nexwest navê xwe bêje û ev demeke dirêj e li herêmê dijî, got ku dêr û keşîşxane ji bo xezîne, zêr, û tiştê din hatine texrîbkirin. Welatî dest nîşan kir ku hîn jî defînger dora dêr û keşîşxaneyê dikolin.