AMED - Esnaf Cevît Satici ku bi salane li Sûka sifirkeriyan merş, mahfûr, tej û berkan ji gundan dikire û difiroşe, diyar kir ku ev kar û pîşe ji bo wî weke evînekê ye û wiha got: "Ez bi hezkirinî vê çandê diparêzim. Neyên kirîn û firotin jî dîsa ez ê vî karî berdewam bikim û biparêzim.

Esnafê 65 salî Cavît Satici, 34 salin li Sûka Sifirkeran a Navçeya Sûrê merş û mahfuran ji gundan dikire û difiroşe. Satici 34 salin bi vî karî debara xwe dike û ji bo wî bûye wekî evîn û hezkirnekê. Satici, anî ziman ku hezkirina wî ya li hemberî merş, mahfûr û berikan ji ber eleqeya diya wî zêde bû û wiha got: "Dema ez zarok bûm dayika min her dem tevna merş û mahfûran çêdikir. Dema merş çêdikir jî hin caran digiriya û hin caran jî dikeniya. Lê pişt re min fam kir ku kesên tevnê dirêsin, hemû êş û şahiyên wan di nava hûnandina tevnê de veşartîne. Her ku kerkît û befşekî li tevnê didin hestê wan zindî dibe û êşên wan şahiyên wan û hemû bîranînên wan zindî dibin."

Satici, anî ziman ku di nava 34 salan de li bajarê Amed, Colemêrg, Agirî û gelek bajarên din geriyaye û wiha got: "Min ji gelek gund û navçeyên herêmê merş û mahfûr stendin. Min ji herêma Colemêrgê ji eşîra Jirkîyan pir mahfûr, berik, merş û teşt stendin. Demekê ev pir bi qîmet bûn. Ji bo mîr û began wekî nexşê dihatin kirîn û firotin.

Satici, anî ziman ku piştî li herêmê kooperatîfvanî pêş ket tevna mahfûr û merşan jî rabû wiha got: "Karê tevnan gelek zor e. kedek mezin dixwaze Niha çandek tune dibe. Piştî Sûr hat dorpêçkirin û bi tang û topan êrîşî sûrê kirin êdî Sûr ne wekî berê ye. Lê ev hezkirina merşan pir zêde ye. Ev çand, kevneşopî û hezkirinek e. Kes nekire û nefiroşe jî dîsa jî ez ê berdewam bikim."