STENBOL - Hunermendên gotin "Pêşî edalet û azadî, paşê huner" Platforma Hunermend Dimeşin ava kirin. Hunermendan dest nîşan kir ku, dema ew û gel bi hev re bin ew ê bikaribin bi ser kevin û ji bo xurtkirina piştevaniyê ew ê tim bitêkoşin.
Hunermendên ku bi dirûşmeya "Ji bo edalet û azadiyê gotinek me jî heye" hatin gel hev "Platforma Hunermend Dimeşin" ava kirin. Hunermendên ku piştî Meşa Edaletê platform ava kirin dê bibêjin "Pêşî edalet û azadî, paşê huner".
‘GOTINEK ME JÎ HEYE'
Lîstikvan Volkan Yosunlu, anî ziman ku ji bo ew dengê xwe li dengê lêgerîna edaletê ya Tirkiyeyê zêde bikin wan platform ava kiriye. Uslu, diyar kir ku di demên ku Meşa Edalet dest pê kir de ew bi pirsên "Em ê çawa binî peyva edaletê tije bikin? Em ê çawa piştevaniya têkoşîna azadiyê bikin?"
Yosunlu wiha got: “Em tevlî meşa Kemal Kiliçdaroglu nebûn. Ji bo dikên hatin talankirin, ji bo zarokên ku mafên wan ên jiyanê hatine binpêkirin, ji bo jinên bi tecawizê re rû bi rû man, ji bo mafê Nûriye û Semîh em ketin rê û me xwe birêxistin kir."
Yosunlu, anî ziman ku li hemberî pêkanînên Tirkiyeyê gotinek wan jî heye û di ser pirsa "Li hemberî van pêkanînan em dikarin çi bikin?" nîqaşan dikin.
‘EM Ê LI KUÇEYAN BIN'
Yosunlu, dest nîşan kir ku cara ewil ew tevlî Nobeta Wijdan û Edaletê ya HDP'ê bûne û wiha axivî: "Ji bo me têkoşîna azadiyê ne ew tişteke ku partiyek an jî rêxistinek bi tena serê xwe xwedî lê derkeve. Divê lêgerîna azadiyê ew tişt be ku her kes piştevaniya wê bike. Em hunermend ji niha û pê ve em ê ji bo xurtkirina piştevaniyê çalakiyên xwe bidomînin."
Lîstikvan Erturk Erkek jî, got ku gelek lîstikvan û reqsker daxilî platformê bûne. Erkek, anî ziman ku divê hunermend û temaşevan li gel hev bin û wiha axivî: "Tevgerîna wan a li gel me ji bo me zaf girîng e û gotina pirsgirêkên wan jî yek ji armancên me yên sereke ne."
Erkek, anî ziman ku ew ê bi platformê bêtir mudaxileyî pirsgirêkan bikin û wiha domand: "Me dît ku em ne bi tenê ne. Ev avahî min kêfxweş dike. Di warê nîqaşkirina pirsgirêkan de qadek me çêbû. Em dikarin ji bo aştiyê jî bibin çirûskek."
‘EM Ê BI HUNERA XWE LI BER XWE BIDIN'
Lîstikvan Cem Baza jî dest nîşan kir ku tenê pirsgirêka wan ne huner e. Baza got ku ew ê ji hêlekê ve çalakiyên xwe yên edalet û azadiyê pêş ve bixin û ji hêlekê ve jî xebatên xwe yên hunerî.
Baza, anî ziman ku li cihekî ku edalet lê tune be huner jî nayê îcrakirin û wiha axivî: "Em ê lêgerîna xwe ya ji bo edaletê bidomînin. Çimkî dijminê li hemberî me zaf hêzdar e. Nûriye û Semîh pêşengiya bi hezaran mirovî kirin. Em ê jî bi hunera xwe tevbigerin."
‘LI DIJÎ POLÎTÎKAYÊN TEPISANDINÊ EM Ê LI GEL HEV BIN'
Lîstikvan Defne Halman anî ziman ku divê pêvajoya ku polîtîkayên çewisandin û tepisandinê zêde ne divê ew li cem hev bin û wiha got: "Em bi dost û temaşevanên xwe re li gel hev in. Ev tiştekî zaf girîng e. Bi hev re çûyîna ber bi azadiyan ve û serketin zaf girîng e."
Hunerhez bi navê “#Sanatcilaryuruyor” dikarin di ser Twitter û Instagramê xwe bigihînin hunermendan.