STENBOL - Muzîkjen-helbestvan Tunay Bozyigit, anî ziman ku li Tirkiyeyê faşîzm xwe bi rêxistin dike û naveroka hunerê tê valakirin. Bozyigit wiha got: "Heke hunermend bêdeng bimîne, dê civak jî bêdeng bibe û em bêdeng man."

Yek ji endamê Seyduna Turkulerî muzîkjen-helbestvan Tunay Bozyigit, balê kişand ser atmosfera siyasî ya Tirkiyeyê û bandora wê ya li ser hunerê. Bozyigit, dest nîşan kir ku Tirkiye di pêvajoyeke dîrokî re derbas dibe û wiha axivî: "Li Tirkiyeyê faşîzm xwe vesaz kiriye. Bi awayekî hêsan bi hezaran kedkar ji kar hatin avêtin. Em di pêvajoyeke teatral de ne. Me hunermendan zaf bertek nîşanî vê yekê neda. Em sûcdar in, çimkî em bêdeng man."

‘NAVEROKA HUNERÊ HAT VALAKIRIN'

Bozyigit, diyar kir ku hunermend serika rehika civakê ye û divê pêşî hemû geşedanên civakê ji aliyê hunermendan ve bê nirxandin. Bozyigit, anî ziman ku hedefa ewil jî qada çand û hunerê ye û niha gav bi gav nevroka hunerê tê valakirin û wiha got: "Me dem bi dem bi dengekî lawaz bertek nîşan dan, lê têrê nekir."

‘DIVÊ EM JI WAN BÊTIR RÊXISTINKIRÎ BIN'

Bozyigit, anî ziman ku divê li hemberî faşîzma xwe vesaz kiriye ew li her qadê jiyanê rêxistinkirî bin û divê hunermend jî wek hemû rêxistinên çînî xwe birêxistin bikin û dakevin kuçeyan. Bozyigit, heta ku gelek birêxistinkirî tune be, dê kes nikaribe xwe li ber faşîzmê bigire û wiha axivî: "Heke ew rêxistinkirî bin, divê em ji wan bêtir rêxistinkirî bin."

Bozyigit, dest nîşan kir ku hunermend ji bo berjewendiyên xwe dev ji hunerê berdane û wiha got: "Em dizanin ka li ser sifreya qesrê bê çawa qeşmeriyê dikin. Heke hunermend bêdeng bimîne, dê civak jî bêdeng bibe û em bêdeng man."

Bozyigit balê kişand ser êrîşên li ser gelê kurd jî û wiha axivî: "Hevserokên partiyekê dîl hatine girtin. Hevşaredar girtî ne, qeyûm tayînî cihên wan hatine kirin. Li vê xakê tirs mezin bûye û em hunermend mecbûr in ku bi hunerê vê tirsê têk bibin." Bozyigit, diyar kir ku tirs çi qas têger be serîhildan jî ewqas têger e û li hemberî faşîzmê banga berxwedan û têkoşînê li hemû hunermendan kir.