AMED - Nivîskarê Rojnameya Rojeva Medya Mihyedîn Melko, di nivîsa xwe ya îro de bal kişand ser polîtîkayên îktîdara AK Partiyê yên Tirkiye û Cihanê. Nivîskar Mihyedîn Melko, anî ziman ku AK Partî ji ber polîtîkayê xwe yên şaş ji cîhanê îzole dibe.

Nivîskarê Rojnameya Rojeva Medya Mihyedîn Melko, di nivîsa xwe ya îro de polîtîkayên îktîdara AK Partiyê girt dest û encama polîtîkayên wê yên li Tirkiye û Cîhanê analîz kir.

Nivîska Nivîskar Mihyedîn Melko wiha ye:

Di van rojên dawîn de di qada navneteweyî de pêşketinên balkêş çêdibin. Hemû kirinên rejîma AKP’ê yên li derveyî mirovahiyê yek bi yek tên pêşberî wê. Tirkiye ji aliyekê ve dixwaze neyartiya kurdan di qada navneteweyî de bigihîne asta jor. Dijberiya wan a Rojava û YPG’ê her car li dîwarên diplomasiya cîhanê dikeve û li wan vedigere.

Amerîka tevî hemû daxwazên wan guh nade bangên neyartiyê. Piştgiriya navneteweyî ya ji bo kurdên Rojava di her alî de berdewam dike.

Neteweyên Yekbûyî rapora qetlîama dewleta tirk a li Cizîr, Sûr, Nisêbîn, Hezex, Şirnex û Geverê weşand û pejirand ku li hemberî sivîlan sûcên mirovahiyê hatiye kirin. NY’ê bang li Tirkiyeyê kir ku destûrê bide heyetên serbixwe da ku li wan deveran lêkolînê bike. Her wiha hat aşkerakirin ku ger dewleta tirk destûrê nede lêkolînê divê qebûl bike ku qetlîam kiriye.

Li aliyê din Yekitiya Ewropayê (YE) ji ber ku Tirkiye ji rêya endamtiya YE’yê derket û jê dûr ketiye, biryar da ku piştgiriya aborî ya dikir, bibire. Ewropayê bi vê biryarê piştrast kir ku Tirkiye ji demokrasiyê dûr dikeve û ber bi dîktatoriyê ve diçe. Jixwe beriya niha jî rapora binpêkirinên mafan hatibû weşandin û rexneyên giran li rêveberiya AKP’ê û Erdogan hatibûn kirin.

Nêzîkahiya hêzên navneteweyî ya di mijara referandûmê de jî naguhere. Welatên Ewropayê yek bi yek aşkera dikin ku ev dengdana li Tirkiyeyê û naveroka qanûnên ku AKP dixwaze bi gel bide qebûlkirin, ne rewa ye.

Ewilî Almanyayê destûr neda wezîrên tirk ku li welatê wan propagandaya faşîzm û dîktatoriyê bikin. Her çi qas Erdogan bi mînaka naziyan bertek nîşanî Almanyayê da jî, lê hemû cîhan dizane ku ew bi xwe dixwaze qanûnên Hîtler derxe û ji bo vê yekê ew wezîrên xwe dişîne Ewropayê.

Pêngava herî mezin jî Hollandayê avêt. Hollandayê destûr neda ku balafira Wezîrê Karên Derve yê Tirkiyeyê Mevlût Çavuşoglu dakeve welatê wan. Her wiha nehişt ku wesayîta wezîra AKP’ê Fatma Betul Sayan Kaya jî bikeve welat. Di dîroka Tirkiyeyê de cara yekemîn e ku welatên Ewropayê wezîrên tirk wek ‘kesên nayên xwestin’ îlan dikin û deriyên welatên xwe ji wan re digirin.

Erdogan û AKP dibînin ku dengên ‘NA’ li pêş in. Ji ber vê yekê jî hewl didin ku mexdûriyetên nû li ser astengiyên Ewropayê ava bikin û dengên xwe zêde bikin. Lê êdî siyaseta AKP’ê ya li ser mexdûriyetê li wê vegeriyaye. Belkî edebiyata mexdûriyetê biryara dengdêrên AKP’î ya ‘erê’ xurttir bike, lê tesîrê li qelskirina dengên ‘NA’ nake. Kurdan ji berê de fêm kiribû, lê piştî polîtîkayên dewletên Ewropayê, êdî muxalîfên AKP’ê û Erdogan fêm kiriye ku rejîma ew saz dikin, li hemû cîhanê ne meşrû tê dîtin.