HATAY - Rejîma Esad a Rûsya piştevaniya wê dike, hewl dide ku li Îdlîbê li dijî Ehrar El Şam û El Nûsraya operasyonekê li dar bixe. Li gel vê, tişta balkêş, Tirkiye leşkeran li sînor bi cih dike.

Tirkiyeya ku li Reqa û Mûsilê li derveyî qadê hat hiştin, li El Babê pêşî lê hat girtin û hemû hewldanên wê yên ji bo Minbicê bê encam man, niha dixwaze li Îdlîbê hebûna xwe bide der. Li got agahiyên bi dest dikevin, rejîma Şamê ya ku Rûsya piştevaniya wê dike, li Îdlîba ku Ehrar El Şam û El Nûsra lê kom bûne, amadekariyên operasyonekê dike. Lê tişta balê dikêşe jî ew e ku bi awayekî hevwext Tirkiye jî leşkerên xwe lî sînor bi cih dike.

Heverastî vê, di 22’yê Adarê de ji hêla Sûriyeyê ve gule hatin berdan û di encama van guleyan de leşkerekî ku li Fermandariya Qereqola Hudûd a Bukulmezê ya Reyhanliyê nobet digirt mir. Piştî mirina leşker xwestin bûyerê li PYD’ê bar bikin. Bi vê jî diyar bû ku Tirkiye amadekariyên planeke nû dike. Lê bi van geşdenan re, di navbera PYD û Rûsyayê de peymanek hatibû îmzekirin û li gor vê peymanê leşkerên rûsan întiqalî van herêman kirin û ev întiqalkirin hesab û kitabên Enqereyê tevlîhev kirin.

Piştî Tirkiye û hêzên OSO’yê yên di bin serweriya wê de li Şehbayê tengavî bûn, bi vê re pozîsyona wê ya li Sûriyeyê jî veguherî rengekî nediyariyê. Piştî van geşedanan niha, hemû çav li ser Îdlîbê ne.

Piştî Hevdîtinên Astanayê agirbestek hat îlankirin û piştî vê agirbestê jî di navbera komên çekdar ên di nav OSO’yê de ne û Ehrar El Şam, El Nûsra û Heyet Tahrîr Şamê de dem bi dem pevçûn didomin. Di heman demê de, Rûsya û artêşa Sûriyeyê jî ji hewayê ve hin hêzên li nav Îdlîbê ne hedef digirin û tê diyarkirin ku dê li Îdlîbê teqez operasyonek bê lidarxistin. Niha Tirkiye ber bi Îdlîbê ve leşkeran bi cih dike û ev jî nîşan dide ku dê di rojên pêş de liv û tevgerek xwe bide der.

‘LIV Û TEVGERA LEŞKERÎ ZÊDE BÛ’

Çavkaniyên herêmî, pişt rast kirin ku bi awayekî zêde ber bi Qereqola Ogulpinarê û Qereqola Bukulmezê yên Reyhanliya Hatayê sewqiyata leşkerî pêk tê. Çavkaniyan dest nîşan kir ku, li ser xeta sînor bi awayekî awarte sewqiyateke leşkerî pêk tê û diyar dikin ku, wesayîtên ku ber ji Îdlîmê ber bi Qarqamişê ve OSO’yî veidguhastin, vê carê bi awayekî tije ber bi sînorê Îdlîbê ve diçin. Hat îfadekirin ku nayê zanîn vê carê di wesayîtan de OSO’yî hene yan jî leşkerên TSK’yê hene, lê sewqiyat bênavber didome.

DERIYÊ SÎNOR Ê BAB EL HAVAYÊ DI BIN VENÊRÎNA NÛSRAYÊ DE YE

Tê diyarkirin ku, hîn jî OSO’yî li herêmên bejahiyî yên leşkerî yên Reyhanli û Kirikhanê tên sekinandin. Di 19’ê Adarê de bi pevçûnên di navbera Ehrar El Şam, El Nûsra û Heyet Tahrîr Şamê de, venêrîna Deriyê Sînor ê Bab El Havayê ketiye destê Nûsrayê. Piştî venêrîna derî ket destê Nûsrayê, çûnhatina li hêla Tirkiyeyê heta demekê hat girtin û tê destnîşan kirin ku piştî demekê dubare ev derbasbûyîn dest pê kirine.

Tê derpêşkirin ku bi van amadekariyan Tirkiye amadekariyên operasyoneke wek "Mertalê Firatê" dike û heke operasyoneek xwe bide der, dê di navbera hêzên rejîmê yên Rûsya piştevaniya wan dike û Tirkiyeyê de pirsgirêkên mezin xwe bidin der.

Her wiha tê diyarkirin ku Rûsyayê leşkerên ku bi navê "navenda şopandina agirbestê" li bajarê Cinderesê yê Efrînê li hembrî van operasyonên Tirkiyeyê bi cih kirine.

Ahmet Kanbal- dîhaber