COLEMÊRG – Bi hatina biharê re pincarên wek rîvas, kereng, pûng, ardû, sterk û gulikê yên ji bo tendirustiyê derman in, li ser dezgeyan cihê xwe girtin.
Bi hatina biharê re li navçeya Çelê, Şemzînan û Geverê yên Colemêrgê pincarên ku ji bo tendirustiyê derman in ji aliyê walatiyan ve li cihên bejahiyî tên komkirin û li navenda bajar li ser dezgehên bazaran tên firotin. Pincarên wek pûng, ardû, sterk, gulik û kerengê yên ku li Geverê li ser dezgeyên li kolana Cengîz Topelê hatine vedan tên firotin bi tahm û şîfaya xwe li ser sifreyên welatiyan jî cihê xwe digirin. Esnafên ku bi firotina pincaran debara xwe dikin, anîn ziman ku ji ber operasyonên leşkerî yên li herêmê di warê komkirina pincaran de jî rastî zehmetiyan tên û ev pincar bi kedeke mezin tên komkirin û li ser dezgeyan cihê xwe digirin.
GEL BI MÛCÎZEYA XWEZAYÊ ABORIYA XWE BERDEWAM DİKE
Mehmet Dûman yê ku li Kolana Cengîz Topelê dezgeya wî heye, anî ziman ku ew zivistanê li ser dezgeya xwe masiyan û bi hatina biharê re jî rîvas, kereng, pûng, ardû û sterkan difiroşe û wiha domand: "Bi sedan kes bi pincarên ku mûcîzeyên xwezayê ne debara xwe dike. Gundiyên ku nêzî 5 mehan di bin şertên zivistaneke hişk de dijîn bi hatina biharê re derdikevin serê çiyayan û ev pincaran kom dikin. Gundiyên ku mirinê didin ber çavan, pincarên ku li cihê qadên leşkerî yên hatine qedexekirin kom dikin û digihînin ser dezgeyên me. Buhayê pincaran ji ber qedexeyê û ji bo nû derketine zêdeye, lê dibe ku di rojên pêş de buhayên wan kêm bibin."
GEL JI BO PINCARAN KOM BIKE, MIRIN DIDE BER ÇAVAN
Gulayîr Çali jî diyar kir ku, di nav pincaran de ya herî zêde ji bo tenduristiyê baş e rîvas e û wiha got: "Rivas li cihên bi bilindahiya xwe hezar an jî 4 hezar metre ne hêşîn tê. Bijîşkên Amerîka û Îngilîstanê ji bo rîvasê dibêjin ku 'Pençeşêrê dide sekinandin û ji holê radike'. Rivas ji bo nexweşînan derman e, ev derman niha li çiyayên Kurdîstanê ne." Çali balê kişand ser pûng, ardû, stêrk û gulîkê jî û wiha domand: "Niha em bi zor xwe digihînin pincarên ku mûcîzeyên xwezayê ne. Ji ber operasyon û qedexekirina qadan, ev pincar nagihîjin ber destê mirovan. Bi taybetî li herêma Oremarê ev pincar pirin, lê nahêlin em kom bikin. Lê dîsa jî li her her tiştî gel mirinê dide ber çavan û pincaran kom dike."