ÎZMÎR - Ciwanên îzmîrî bi şîara "Ji Serokdewletiyê re 'Na', Ciwan Hene", bênavber xebatên "Na"yê bi rê ve dibin. Ciwanan diyar kir ku, ji bo eşqa serokdewletiyê ya Serokomar Erdogan bitemirînin, peywireke zêde dikeve ser milê ciwanan û gotin, ew ê li her qadê ji bo "Na"yê têbikoşin.

Ciwanên îzmîrî bi şîara "Ji Serokatiyê re 'Na', Ciwan Hene", bênavber xebatên "Na"yê bi rê ve dibin. Ciwanan diyar kir ku, di vê serdemê de peywireke dîrokî dikeve ser milê ciwanan û gotin, dê ciwanên Tirkiyeyê di 16'ê Nîsanê de tenê dengdayîna qanûna bingehîn nekin, di heman demê de dê dengdayîna pêşeroja xwe jî bikin. Saziyên ciwanan, anîn ziman ku di civakê de hêviya herî mezin ciwan in û gotin, ew ê di sindoqên referandûmê de "Na"yê derxînin û vê hêviyê mezintir bikin.

‘LI PÊŞ ME PEYWIREKE DÎROKÎ HEYE'

Endama Devrimci Yolda Devrimci Gençlik Îpek Înceler, anî ziman ku di her serdemên dîrokê de ciwan hîma bingehîn a veguherînê ne û got, referandûma 16'ê Nîsanê ji bo ciwanên Tirkiyeyê peywireke dîrokî ye. Înceler wiha axivî: "Bi OHAL'an, bi KHK'yan, bi bombeyan, her roj bi komkujî û çewisandinên nû dixwazin me daxilî nav vê pergalê bikin. Lê belê, ji bo temirandina sewdaya serokatiyê ya Erdogan, peywireke mezin dikeve ser milê ciwanan. Çawa ku nifşên 68'an alaya antîemperyalîst, antîfaşîst bilind kirin, dê îro jî bi şîara ji serokatiyê re na, li li kuçeyan, zanîngehan, li qadan bilind bike."

'ERÊ JÎ DERKEVE Û NA JÎ DERKEVE DÊ TÊKOŞÎNA ME BIDOME'

Endamê Tevgera Xwendekarên Sosyalîst Dogan Yolcu jî, diyar kir ku ji aliyê dewletê ve li ser ciwanan çewisandineke mezin heye û got, li gel hemû çewisandinên dewletê jî gel û ciwan bi awayekî zêde piştevaniya wan dikin. Yolcu wiha axivî: "Li zanîngehan, li lîseyan û qadên din xebatên me rastî bertekên erênî tên. Yên dixwazin beşdarî xebatên me bibin hene. Em wek Tevegra Xwendekarên Sosyalîst li hemû qadan li dijî dîktatoriyê, faşîzmê, kapîtalîzmê û her cure paşverûtiyê dengê xwe bilind dikin. Bi rêxistinbûyîna 'Na'yê em ê hewasa dîktatoriyê rawestînin. Di referandûmê de erê jî û na jî derkeve dê têkoşîna me her bidome."

Yolcu, anî ziman ku ew li hemû qadan bênavber xebatên xwe didomînin û wiha got: "Wek Tevgera Xwendekarên Sosyalîst ji bo perwerdehiyeke wekhev, bê pere, zanistî û bi zimanê dayikê, ji bo mafên kedkar û karkeran, ji bo daxwazên me yên demokratîk, ji bo azadiya çapemeniyê, li dijî feraseta zayendî, tecawizkar û dijminahiya li hemberî LGBTÎ'yan, li dijî çewisandinan, li dijî yek ol û yek mezheban û hwd. em bang li herî kesî dikin da di referandûmê de bibêjin 'Na'."