STENBOL - Ciwanên ku di 45'emîn salvegera darvekirina wan de Deniz Gezmiş, Yusuf Aslan û Huseyin İnan bi bîr anîn wiha gotin: "Bibîranîna Deniz Gezmiş, parastina têkoşîna gelê kurd e, bibîranîna Yusuf Aslan pêşvebirina têkoşîna çîna karker û kedkaran e, bibîranîna Huseyin İnan parastina têkoşîna azadiyê ye."
Di ser darvekirina pêşengên şoreşger ên nifşên 68'an Deniz Gezmiş, Huseyin İnan û Yusuf Aslan de 45 sal derbas bûn. Ciwanên Diren Unîversîte, Kaldiraç, Meclîsa Ciwanan a Kongreya Demokratîk a Gelan (HDK) û Yekîtiya Xwendekaran a Şoreşger her sê pêşengên şoreşger bi bîr anîn.
‘GOTINA BIJÎ BIRATIYA GELÊN KURD Û TIRK GOTINEKE MEHENGÎ YE'
Xwendekarê Zanîngeha Stenbolê û aktivîstê koma Diren Unîversiteyê Gokhan Alkan, anî ziman ku Deniz Gezmiş, Huseyin İnan û Yusuf Aslan her yek ji wan nirxeke cuda û pêşengên şoreşger in. Alkan, dest nîşan kir ku ew di têkoşîna xwe ya li zanîngehê de her sê pêşangan ji xwe re wek mînak esas digirin û got ku, Mahir Çayan, Îbrahim Kaypakkaya û Mazlum Dogan jî xwedî nirxeke cuda ne. Alkan, diyar kir ku her sê pêşengên şoreşger, di dema darvekirinê de qet serî netewandine û got ku, meşa wan û gotinên wan ên li ber sêpêyê xwedî girîngiyeke mezin in. Alkan wiha got: "Îro dijminatiya bir kurdan re didome. Yek ji wan gotinên ku îro divê meheng be, gotina 'Bijî biratiya gelên tirk û kurdan' e. Bi taybetî jî dema îro em li dijminatiya AK Partiyê ya li hemberî kurdan dike dinihêrin, ev gotin ji bo me îşaretê bi têkoşînê dikin." Alkan, dest nîşan kir ku riya xwedîderketina li têkoşîna Denizan, Mahiran, Îbrahîman, Mazlûman di têkoşîneke yekbûyî re derbas dibe û got ku, divê mirov ruhê wan ê têkoşer veguhêzîne kuçeyan.
Nûnerê Yekîtiya Xwendekarên Şoreşger ê Stenbolê Muhammed Hizmetçi, anî ziman ku çend awayên bîranîna sê pêşengên şoreşger hene û wiha axivî: "CHP hem wan bi dar ve kir hem jî wan bi bîr tîne. Dema wan bi bîr tîne jî hêla wan a komunîst û şoreşger bin pê dike." Hizmetçi, dest nîşan kir ku ew ê li dijî binpêkirina hêla wan a komunist û şoreşgeriyî rawestin û got ku, ew ê tim xwedî li mîrateya wan derkevin.
Hizmetçi, anî ziman ku Yusuf Aslan zarokê malbateke kedkar bû û wiha axivî: "Huseyin Înan zarokê malbateke elewî bû. Huseyin komunîstek bû, lê çanda ku jê dihat elewîtî bû. Ji ber vê divê îro elewî xwedî li têkoşîna Huseyin Înan derkevin û bidomînin." Hizmetçi wiha behsa têkoşîna her sê pêşengan kir: "Bibîranîna Deniz Gezmiş, parastina têkoşîna gelê kurd e, bibîranîna Yusuf Aslan pêşvebirina têkoşîna çîna karker û kedkaran e, bibîranîna Huseyin İnan parastina têkoşîna azadiyê ya kedkarên elewî, hemû gelên kedkar û bindest, hemû netewe û baweriyan e. Ji bo xwedîderketina wan em ê li Kadikoyê wan bi bîr bînin û ji bo vê em bang li hemû karker û kedkaran dikin ku xwedî li vê bîranînê derkevin."
‘JI DAGIRKERIYA LI ROJHILATA NAVÎN RE GOTIN 'NA''
Ji xwendevanên Kovara Kaldiraçê Ozge Akyuz jî, dest nîşan kir ku wek her salê ew ê îsal jî tevî rêxistinên ciwanan ên ciwanên HDK'î, Kaldiraçê, SGDF'ê jî di nav de li Dolmabahçeyê çalakiya bîranînê li dar bixin. Akyuz, îşaret pê kir ku dê girîngiyeke cuda ya bîranîna îsal hebe û wiha got: "Ji 68'an heta niha 'Na'ya Deniz, Huseyin, Yusuf û ya ciwanan didome." Akyuz, anî ziman ku pêşengên şoreşger ji rektorên zanîngehan re gotine "Na", ji dagirkeriya li Rojhilata Navîn re gotine "Na" û got ku, îro jî ew ji hemû çewisandinên li ser civakê tên kirin re dibêjin "Na". Akyuz, îşaret pê kir ku ne tenê ciwan, divê hemû eniya "Na"yê jî xwedî li her sê pêşengên şoreşger derkeve û wiha got: "Gotina 'Na', di heman demê de tê wateya xwedîderketina li têkoşîna wan."
‘6'Ê GULANÊ NAVÊ BÎRDOZIYEKE MEZIN E'
Ji endamên Meclîsa Ciwanan a HDK'ê Roza Kahya jî wiha axivî: "6'ê Gulanê navê bîrdoziyeke mezin e. 6'ê Gulanê têkoşîna Mahir Çayan, İbrahim Kaypakkaya, Mazlum Dogan, Şoreşa Rojavayê û jina ye. Divê em di 6'ê Gulanê de xwedî li vê bîrdoziyê derkevin."