EDENE - Li Edeneyê ciwanên ku bi dirûşmeya "Ciwan li dijî asîmlasyonê tên cem hev" meclîs ava kirin, diyar kirin ku ew ê nasname, ziman û çanda xwe li meclîsa ku avakirine jîndar bikin. Ji bo têkoşîneke bi hev re bang li hemû ciwanan kirin.

Ciwanên ereb ên endamê Komeleya Piştevaniyê ya Gelê Ereb ê Elewî (AHADER) a Edeneyê, bi dirûşmeya "Ciwan li dijî asîamlasyonê tên cem hev" Meclîsa Ciwanan a Erebên Elewî ya AHADER'ê ava kirin. Ciwanan, diyar kir ku ew ê di bin banê meclîsê de xwe bi rêxistin bikin û li dijî asîmlasyonê bitêkoşin.

'DIVÊ LI DIJÎ ASÎMLASYONÊ EM BÊN GEL HEV'

Endamê meclîsê Huseyin Para, anî ziman ku pêdiviya ciwanan bi meclîseke ku karibin pirsgirêkên xwe lê nîqaş bikin û ji bo van pirsgirêkan çareseriyan biafirînin heye. Para ê ku got "Divê em ciwan li dijî asîmlasyonê rêxistinbûyîna xwe pêk bînin" anî ziman ku ew ê bi vê meclîsê orf û edetên gelê ereb jîndar bikin. Para wiha got: "Em ê li vir qursên erebî û perwerdehiya şanoya erebî bidin. Her wiha di rojên pêş de jî em ê konferans û forûman li dar bixin."

'DÊ CIWAN NASNAMEYA XWE BIPARÊZIN'

Endama meclîsê Nilay Barutçu jî, dest nîşan kir ku di nav pergalê de derdora herî aktîf ciwan in û ji ber vê yekê ye ku ciwan tim di hedefa pergalê de ne. Barutçu, ragihand ku wan meclîsê ji bo ku pirsgirêkên ciwanan çareser bike ava kiriye. Barutçu, anî ziman ku ji bo ciwanan dejenere bike û bitevizîne pergal bi hemû hêza xwe tevdigere û wiha axivî: "Dê ciwan bi vê meclîsa xwe li dijî van pêkanînan rawestin. Dê li cewhera xwe bigere. Dê ciwan nasname û çanda xwe biafirînin û potansiyeleke wan a bi vî rengî heye. Em ê vê potansiyelê jî li vê meclîsê bînin gel hev."

'EM LI BENDA HEMÛ CIWANA NE'

Barutçu ya ku got "Dê ciwan heta dawî rêxistinbûyîna xwe bidomînin" bang li hemû ciwanên gelên bindest kir ku da li meclîsa ava kirine li dijî pergalê bitêkoşin. Barutçu wiha domand: "Em li benda hemû ciwanên ku dixwazin nasname û zanyariya xwe bi pêş bixin. Armanca me; jîndarkirina çand û nasnameya me ye. Em ê bi vê mebestê atolyeyên cuda vebikin. Ji xwe niha li komeleyê dersên erebî û perwerdehiya şanoya erebî tê dayîn. Em ê van xebatên xwe pêşvetir ve bibin. Em ê li Edeneyê dakevin taxên erebên elewî û çalakiyan li dar bixin. Armanca me jîndarkirina çand û zimanê me ye." Barutçu bang li hemû ciwanên gelên din ên ku çand û zimanên wan tune tên hesibandin kir, da ku li bin banê vê meclîsî li dijî asîmlasyonê bi hev re bitêkoşin.