ROJANE

*Her çendî biryar hat dayîn ku dê lêçûnên Cemxaneyê ji hêla dewletê ve bên pêşwazîkirin jî, BEDAŞ'ê guh neda biryarê û ceryana Cemxaneyê qut kir. Serokê Weqfa Çand û Perwerdehiyê ya Erenlerê Emîn Yilmaz, got ku BEDAŞ'ê guh nedaye biryarê.

*Hat hînbûn ku Keleha Derbxanyê ya bi dînamîtana hat rûxandin ne daxilî herêma ku dê di bin avê bimîne de ye. Her wiha kifş bû ku îmzeya Serokê Kolandina Heskîfê Prof. Dr. Abdulsselam Uluçam ku ji ber endamê Cemaeta Gulenê ye hat girtin di bin projeyê de heye.

*Şewatên ku bi rojane li herêmên girêdayî Şirnexê didomin, hin jê bi xwe tefiyan. Lê belê ji ber topbaranan agir bi qadên din ket. Bi hinceta "ewlehiyê" destûra mudaxilekirina şewatê nayê dayîn û ji ber vê cihwarên dîrokî û erdên çandiniyê zirar dîtin.

*Li Sûrê koma rûxandinê îmze avêt bin skandalekê. Koma rûxandinê mala malbata Ayata ku ji ferdên malbatê yek jê berasteng û yek jê jî nexweşê pişikê ye rûxand û paşê ji birayên Ayata re got "Pardon!".

* Hiqûqnasên ku nobeta Wîcdan û Edaletê ya HDP'ê ziyaret kirin diyar kirin ku li Tirkiye ne pêkan e mirov behsa hiqûqê bike.

* Şaxa ÎHD'ê ya Edeneyê bi tevlêbûna Parlamentera HDP'ê ya Edeneyê Meral Daniş Beştaş, dê têkildarî jina 15 salî ya 4 salin rastî tacîza rêveberê apartmanê tê civîna çapemeniyê pêk bînin. (12.00)

* Platforma Em dê Cînayeta Jinan Rawestînin, dê li Kolana Bahariye ya Kadikoyê starta kampanya "Ji bo me hemûyan perwerdehiya laîklîk" bidin. (16.00)

Çalakiya Nobeta Wîcdan û Edaletê ya HDP'ê ku li Qada Gundogdu dane destpêkirin di roja 6'emîn de berdewam dike.

POLÎTÎKA

*Wezîrê berê yê AKP'î Ertugrul Gunay, diyar kir ku AKP'a ku her cure tifaqî belavkirin bi salan wek koalîsyonekê tevgeriya û wiha got: "Li hemberî koalîsyona netewperest ji bilî têkoşîna hevpara a hêzên demokrasiyê pêvtir tu alternatîf tune ye."


JIN

*Halîme Yeşîlmen ku ji ber êrîşên dewletê ji Kerboranê koçî Stenbolê kir, bi vekirina dikaneke ku lê kincên neteweyî didirû û difiroşe, debara malbata xwe dike.

*Qeyûmê Şaredariya Bajarê Mezin a Wanê Navenda Jiyanê ya Jinan a Rojîn ku 3 salin di bin banê şaredariyê de xizmet dida jinan girt û li şûna wê "Navenda Jiyanê" ku zarok lê qursa Qur'anê dibînin vekir.